> Perígulu impestadura in su Surcis: in Portuascusi si papat metallu | ilMinuto

Perígulu impestadura in su Surcis: in Portuascusi si papat metallu

Ascurta custa nova

(S’úrtima nova) – Casteddu, 31 de su mesi de gennàrgiu – Is babus e is mamas de is pipius fintzas a is tre annus chi bivint in Portuascusi no depint donai de papai a is própriu fillus scéti ortalitzias e fruta coltivaus in su territóriu de su comunu de su Surcis, ma depint fai atentzioni a comporai puru prodotus araus in logus diversus. Est cantu narat una comunicatzioni ufitziali de sa Asl de Crabònia, fatta connosci cida passada de sa boxi Frantziscu Fuggetta. I terrenus de Portuascusi, puru si su comunicau no ddu narat in forma ufitziali, funt duncas impestaus de is industrias a su puntu de ponni in perígulu sa saludi de is pipieddus. S’arriscu est stétiu acrarau de unu relatu de s’Istitutu de Sanidadi fatu apitzus de s’impestadura de su territóriu comunali de Portuascusi. Asuba de sa chistioni fueddant cun d-una nota su Grupu de interventu giurídicu e is Amigus de sa terra.“Sa cosa de papai de Portuascusi – pretzisant is ambientalistas – est impestada, ma no si podit nai in forma uftziali[…]. In Portuascusi si papant metallus grais. E no ddu faint scéti is pipius”. Ita ndi pentzais bosàterus? Sa redatzioni de IlMinuto torrat cras cun d-un’àtera puntada de S’úrtima nova: unu progetu chi bit a su ligidori protagonista de su giornali inditendi is novas chi fueddant de Sardigna e chi po issu funt de importu mannu.

Scàrriga custa nova

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda

© RIPRODUZIONE RISERVATA

6 Risposte a “Perígulu impestadura in su Surcis: in Portuascusi si papat metallu”


  • Bravusu picioccus! Eis fattu beni a scriri sa nova chi apu nau eriseru deu. Gratzias!

  • te schiffu custa cosa, esti prenu de burrumballa e nosi pappausu e bufausu cunvintusu chi sianta cosasa bellassa bò bò :/

  • seus donendi a pappai metallu a is pippius e nisciunu ndi chistionara! mellu chistionai de su Casteddu e de Cellino…

  • Fabiu sa genti non tenidi prusu conca de nudda scetti po su calciu e totu cussasa cosasa chi lianta is penzamentusu….

  • Tenis arrexoni Lina!

  • po nai sa beridadi est de medas annus chi in cussu territoriu ddo i est s’allarmi po su chi produxit la terra, no bollu nai fabas ma at’a essi prus de dexi annus chi si chistionàt de custa cosa, cumenti a in donnia logu aundi nc’est fabbricas e cementerias e sa lista est longa… e chi ddu narat s’asl bolit nai ca sa situatzioni est propiu disisperada!!! ma custu Sulcis est diaderus disgratziau, ma sa Sardigna est totu disgratziada, non c’est traballu, e su pagu chi nc’est de una parti si fait papai, e de s’atra si bocit cun custu malis maus…..

I commenti sono chiusi.