> Ecunumia: sa papa reali sarda unu primori in su mundu | ilMinuto

Ecunumia: sa papa reali sarda unu primori in su mundu

Ascurta custa nova

(S’úrtima nova) – Casteddu, 24 de su mesi de fiàrgiu – Ita est sa papa reali? Est sa sustàntzia prus arrica in natura de àcidu ‘Pantotenico’, un’àcidu chi s’agatat in is tzéllulas de is músculus, de su cerbeddu, de su figau e de is arrigus. Sa papa reali si presentat comenti una geladina e benit cunsiderada comenti unu de is alimentus naturalis chi funt fonti de saludi. Cali acapiu tenit custu elisir de vida cun sa Sardigna? S’arraspusta lompit de unu studiu de s’Universidadi de Tàtari chi cumproat ca sa papa reali fata in s’Ísula, gràtzias a is carateristicas chímicas e físicas acapiadas a su territóriu, tenit elementus chi dda faint única in su mundu. Mancai aici sa Sardigna produsit de is 50 a is 100 chilus de papa reali, una produtzioni dexi bortas prus pitica de sa dimanda de su mercau. Is datus funt bessius a pillu cenàbara passau in d-un’atóbiu aprontau de Opas Terrantiga e de su Copait Cunsórtziu Papa Reali Italianu.“Puntai a sa produtzioni de papa reali – narat Frantziscu Caboni de s’Apistica e membru de Op ‘Apicoltori’ sardus – podit essi un’afortiamentu a s’atividadi apistica ma puru unu traballu beru”. De is spricullitus fatus, duncas, sa Sardigna tenit is cartas giustas po si nci ghetai in d-una produtzioni a dimensionis prus mannas. E bosàterus ita ndi petzasis? Sa redatzioni de IlMinuto torrat cras cun d-un’àtera puntada de S’úrtima nova: unu progetu chi bit a su ligidori protagonista de su giornali inditendi is novas chi fueddant de Sardigna e chi po issu funt de importu mannu.

Scàrriga custa nova

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda

© RIPRODUZIONE RISERVATA

2 Risposte a “Ecunumia: sa papa reali sarda unu primori in su mundu”


  • BELLA CUSTA PURU! NON DA SCIDIU!

  • esti ora de cumprendi ca ci da podeusu fai asolosu, esti a lassai s’Itallia, ma is sardusu funti tontusu e non du cumprendinti custu, ci olidi pagu a biri ca si funti portendi a sa miseria, ma seusu miserusu de conca nosu, non deu du ollu precisai custu, deu seu unu sardu liberu e custa arraza de genti non da votu, scidanisindi de su sonnu!!!!!

I commenti sono chiusi.