> Sanidadi: Sardigna ísula acatosa e de coru bonu | ilMinuto

Sanidadi: Sardigna ísula acatosa e de coru bonu

Ascurta custa nova

(S’úrtima nova) – Casteddu, 27 de su mesi de fiàrgiu – Puru in su 2011 sa Sardigna donat cunfirma de essi un’ísula acatosa e de coru bonu po sa donatzioni de is òrganus. Ddu testimoniant is datus fatus connosci, su 17 de su mesi de fiàrgiu passau, de su Tzentru regionali trapiantus, de s’assessori regionali a sa Sanidadi Simona De Francisci, de su diretori de s’istrutura Carlu Carcassi, de sa dirigéntzia de su Brotzu de Casteddu e de is verticis de s’Asl 8. Sa Sardigna, difatis, est a su terzu postu in sa graduatória italiana po su númeru de donadoris impitaus, mentris est a su primu postu intre is regionis de s’organizatzioni Ocst de su tzentru-sud de sa penísula (Abrutzu, Basilicata, Campania, Calabria, Laziu, Puglia e Sicilia). Cali funt is númerus in chistioni? De is repartus de ravivamentu de su territóriu sardu, registraus po s’atividadi de donatzioni de òrganus, funt stétias fatas 62 signalatzionis e 34 funt is donatzionis impitadas. In Sardigna funt stétius fatus 58 trapiantus de arrigu, 10 trapiantus de coru e 26 de figau, po unu totali de 96 òrganus donaus e trapiantaus.Ma no est acabada innoi, funt stétias donadas e pigadas puru 36 còrneas, “Funt datus – narat s’assessori De Francisci – chi premiant su traballu fatu dógnia diri chentza de pàsiu de toutus is operadoris e de is assótzius de voluntariau e chi testificant su coru bonu e istraordinàriu de is famílias sardas”. E bosàterus ita ndi pentzasis? Sa redatzioni de IlMinuto torrat cras cun d-un’àtera puntada de S’úrtima nova: unu progetu chi bit a su ligidori protagonista de su giornali inditendi is novas chi fueddant de Sardigna chi po issu funt de importu mannu.

Scàrriga custa nova

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda

© RIPRODUZIONE RISERVATA

2 Risposte a “Sanidadi: Sardigna ísula acatosa e de coru bonu”


I commenti sono chiusi.