> Abia de una messarítzia sana. In Casteddu si fueddat de ortus sinergicus | ilMinuto

Abia de una messarítzia sana. In Casteddu si fueddat de ortus sinergicus

Ascurta custa nova

(S’úrtima nova) – Casteddu, 13 de su mesi de martzu – Su 16 de su mesi de martzu, de is 17.00 a is 19.00, s’Assótziu Musa aprontat in Casteddu, in su cuarteri de Mulinu Béciu, in is aposentus de su tzentru comunali genericu “Area tres” de bia Carpaccio, unu seminàriu de scedas, impari a su Datori Arrobertu Gessa, po chistionai de Messarítzia sinergica, metodu de coltivatzioni imbentau de messaja ispagnola Amillia Hazelip. “Is printzipius de sa Messarítzia sinergica funt pagus e simplis: fai a manera chi su terrenu no benzat furriau e compatau […], mantenni su pillu de sa terra sèmpiri amantau e no impitai nisciunu tipu de làdamini e diserbanti”. In pagus fueddus, mentris sa terra fait cresci is matas, is matas creant terra saliosa atressu de is arrestus orgànicus chi liberant e atressu se s’atividadi chímica. “Su sistema ambientali cumplessu chi si format in is annus chentza de istrobu in sa terra, – si ligit in d-una nota fata connosci de s’Assótziu Musa – est fillu de un’atzioni simultànea de is diversus orgànismus chi s’agatant ingunis, e chi funt impensàbilis in sa messarítzia conventzionali, e s’ispantu beru de custa ténnica est ca assegurat produtus bellus meda”. Chini pratigat sa messarítzia sinergica sighendi is imparamentus de sa Hazelip, narat difatis ca is prodotus otentus cun custa pràtiga tenit una calidadi difarenti, una diversa energia e un’apómpiu prus mannu a is pestas. Atressu de custu modu de traballai sa terra benit torrada meda prus energia a su terrenu, promovendi is mecanismu de auto-fertilidadi de sa terra e fadendi de sa messarítzia una faina umana sustenìbili. E bosàterus ita ndi petzasis? Sa redatzioni de IlMinuto torrat cras cun d-un’àtera puntada de S’úrtima nova: unu progetu chi bit a su ligidori protagonista de su giornali inditendi is novas chi fueddant de Sardigna e chi po issu funt de importu mannu. Scàrriga custa nova

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda

© RIPRODUZIONE RISERVATA

1 Risposta a “Abia de una messarítzia sana. In Casteddu si fueddat de ortus sinergicus”


I commenti sono chiusi.