> “Custu est su Procu”. In Serrenti proietzioni e dibàtidu po chistionai de promotzioni, amparu e traditzionis | ilMinuto

“Custu est su Procu”. In Serrenti proietzioni e dibàtidu po chistionai de promotzioni, amparu e traditzionis

Ascurta custa nova


(S’úrtima nova) – Casteddu, 22 de su mesi de martzu – Podeus nai ca sa vida de s’ómini est acapiada a su tempus, e duncas a su tempus andau puru. De custu e de s’amentu suu imbasteus s’esisténtzia de custu mundu, aici, “dógnia tanti, fai unu viàgiu a torradura agou in su tempus, sighendi su fiu de sa mamoria, torrendi a iscoberri is sciris e is saboris berus de sa traditzioni de su logu, de sa tzivilidadi massarza fait beni”. Po ddu fai, circhendi de promovi su territóriu, perou, ”tocat a insutzuligai a is giòvanus, indùsiri a is mannus e trisinai a is antzianus de sa comunidadi”. Custu est su coru de su pentzu chi movit a s’Assótziu Imparis de Serrenti, chi po arrexonai de promotzioni, amparu de s’ambienti, defensa e avaloramentu de is traditzionis de sa messarítzia e alimentaris at abritiau e aprontau po sàbudu 24 de su mesi de martzu a is 18.30, in is aposentus de s’ex Bocidroxu de Serrenti, sa proietzioni de unu documentàriu. Su film, girau in Marmidda de Pieru e Tomasu Tatti tentit comenti títulu “Custu est su Procu” e tucat de una pregunta: “Si podit acastiai, torrai a iscoberri e isfrutai su patrimóniu de is connoscéntzias, su patrimóniu sotziali e su patrimóniu culturali de una comunidadi?” Unu mamentu de cunsidériu, duncas, innoi s’atraimentu de s’amàinu de sa Sardigna traditzionali e is costumàntzias de su tempus passau  funt galanus e capatzis de ingrangulai. Sa pregunta bessit naturali: sa connoscéntzia de su chi est stétiu no podit essi impreada imbecis comenti istrumentu de avaloramentu culturali e de crescimentu si castiada abbia de unu tempus benidori culturali dinamicu? E bosàterus ita ndi petzasis? Sa redatzioni de IlMinuto torrat cras cun d-un’àtera puntada de S’úrtima nova: unu progetu chi bit a su ligidori protagonista de su giornali inditendi is novas chi fueddant de Sardigna e chi po issu funt de importu mannu.

Scàrriga custa nova

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda

© RIPRODUZIONE RISERVATA

0 Risposte a ““Custu est su Procu”. In Serrenti proietzioni e dibàtidu po chistionai de promotzioni, amparu e traditzionis”


I commenti sono chiusi.