> Prodúsiri e aprontai cultura teatrali a foras de is teatrus: is progetus de Carpe Diem | ilMinuto

Prodúsiri e aprontai cultura teatrali a foras de is teatrus: is progetus de Carpe Diem

Ascurta custa nova


(S’úrtima nova) – Casteddu, 21 de su mesi de martzu – Una de is facis chi contradistìnghit sa faina de pagu prus de binti annus de is Progetus Carpe Diem est s’abiléntzia de prodúsiri e aprontai ocasionis de cultura a foras de is teatrus conventzionalis. In is annus passaus funt stétius diversus is logus animaus de is propostas culturalis de Carpe Diem: Casteddu e su tzentru istóricu suu cun su Progetu Cervantes; s’arburada Buoncaminu, su Bastioni Santu Remì e is Giardinus Públicus cun sa Rassegna de su Teatru Internatzionali de Arruga; Cuartu e is domus campidanesas, aundi unu mangasinu de binus in làdiri po duus annus est diventau s’Ispàtziu de Carpe Diem; is biddas de sa Marmidda; is Minieras de Monti Béciu cun su Festival Cantieris. Protagonista oi est sa Domu de is Istórias de arruga Ponchielli 39 in Casteddu, una residéntzia butega de maistu de pannu, unu logu de pentzu, de sperimentatzioni e produtzioni artística, ma puru un’ingruxeri de artistas e aspetadoris. De innoi nascit sa rassegna Teatru Po Logus Prus Bellus, innoia s’atori atopat a s’aspetadori in su logu iscénicu e in su logu de “dógnia diri”, su chi abarrat, candu spaciat s’ispetàculu, agiudendi unu cunfrontu cun is chi ant pigau parti a s’avenimentu, ma puru cun is artistas protagonistas suus. Una bidea chi tenit comenti arrisurtau su scàmbiu lestru e formativu po chini “fait” s’arti e po chini dda “gosat”. Totu s’istória de is Progetus Carpe Diem no fueddat duncas de teatru scéti ma de logus puru, chi gràtzias a sa cultura funt e podint essi “logus prus bellus”, po comunicai, po si cunfrontai, po cresci comenti personis e comenti colletividadi. E bosàterus ita ndi petzasis? Sa redatzioni de IlMinuto torrat cras cun d-un’àtera puntada de S’úrtima nova: unu progetu chi bit a su ligidori protagonista de su giornali inditendi is novas chi fueddant de Sardigna e chi po issu funt de importu mannu.

Scàrriga custa nova

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda

© RIPRODUZIONE RISERVATA

1 Risposta a “Prodúsiri e aprontai cultura teatrali a foras de is teatrus: is progetus de Carpe Diem”


I commenti sono chiusi.