> Serras fotovoltaicas de Narabuja: fonti energética de agiudu económicu o interventu speculativu? | ilMinuto

Serras fotovoltaicas de Narabuja: fonti energética de agiudu económicu o interventu speculativu?

Ascurta custa nova


(S’úrtima nova) – Casteddu, 28 de su mesi de martzu – A pabas de un’istàntzia de is assótzius ecologistas Grupu de Interventu Giurídicu e Amigus de sa Terra, su Ministeru de s’Ambienti at pediu a s’assessorau regionali de sa Difesa de s’Ambienti de s’interessai de is serras fotovoltaicas de Narabuja. Su 1 de su mesi de martzu passau is duus assótzius ant difatis fatu dimanda de scedas de tipu ambientali pedendi puru de fai interventus adatus po su cumentzu de su “progetu po cumprimentu de òperas de melloria de is terras in amanniamentu agricolu” de parti de sa EnerVitaBio, po unu totali de 1611 serras fotovoltaicas asuba una subrafaci de 63 ètarus. Segundu cantu est prevìdiu de s’artículu 12 de su decretu legislativu 387 de su 2003 po su cumprimentu de su progetu serbit unu permissu únicu chi depit essi lassau de sa Regioni, ma “de is scedas disponìbilis – pretzisant is duus assótzius – su progetu parrit auturitzau scéti cun determinatzioni única n. 4 de su 12 de su mesi de gennàrgiu de su 2012 de su Responsàbili de su Serbítziu Area ténnica de su Comunu de Narabuja”.Est po mori de is scarsesas de permissus ca su Grupu de interventu Giurídicu e is Amigus de sa Terra ant pediu sa frimada de is traballus e su sboddicamentu de is cumproas adatas e s’adotadura de is providimentus chi si faint netzessàrius. E bosàterus ita ndi petzasis? Sa redatzioni de IlMinuto torrat cras cun d-un’àtera puntada de S’úrtima nova: unu progetu chi bit a su ligidori protagonista de su giornali inditendi is novas chi fueddant de Sardigna e chi po issu funt de importu mannu.

Scàrriga custa nova

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda

© RIPRODUZIONE RISERVATA

0 Risposte a “Serras fotovoltaicas de Narabuja: fonti energética de agiudu económicu o interventu speculativu?”


I commenti sono chiusi.