> Bellu Lunis de Pasca manna 2013 a su stàini de Pauli-Pirri o de Terramàini | ilMinuto

Bellu Lunis de Pasca manna 2013 a su stàini de Pauli-Pirri o de Terramàini

(IlMinuto) – Casteddu, 3 de su mesi de arbili – Mancai custu mengianu fessit proendi giai de is otu e mesu, mi nci seu bessiu aici etotu a mi fàiri una passilladedha. Po primu primu seu andau a mari a su Poetu a sa de cuàturu firmada. E apustis chi at cumentzau a proi seu bòfiu passai, primu de furriai a domu, a biri ita fiat sutzedendi in su stàini de Terramàini, a is làcanas de Pauli e Pirri.

Denanti ariseru is mangonis chi si fenta apataus po si pàsciri in su stàini fenta lòmpius a doxi e a noi. Una meca segundu mei. Femu prexau meda e cun su nuscu in is càrigas de sa tiria arva e de is àterus froris ca funti spannedi in custu bellu beranu e chi in domìnigu de Pasca manna fiat giai cumentzendi a èssiri bascosu.

Femus in su “trend” de crèsciri, de is ses mangoni chi emu apubau in su 20 martzu, biemu amatuchendi su cedhoni de cudhus pillonis. Ma custu mengianu, 31 Martzu, no creemu ca is mangonis podessint arribbai a cuìndixi. Stravanau!

Seu abarrau una mesoredha e apu tirau unas cantu fotugrafias, mancai no funti bessias beni po sa pagu luxi e ca seu fintzas pagu bonu deu etotu. Si dhas mandu po dhas amostai in su giorronnali e a is de s’arretza.

Su tanti de àcua in su stàini est amatuchendisia e forsis chi su tempus s’agiudat prus de s’annu passau, ca su stàini si fiat asciutau e fiat torrau a unu pagu de prus de unu cuàturu de sa mannaria cosa sua e de imoi, e chi sighit a proi, forsis ocannu nci passaus s’istadi cun prus àcua e prus friscura in su parcu e in bidha.

“Sa nadura est manna s’arrexoni est pitica”. Aici narat Jacu.

francudefabiis

© RIPRODUZIONE RISERVATA

0 Risposte a “Bellu Lunis de Pasca manna 2013 a su stàini de Pauli-Pirri o de Terramàini”


I commenti sono chiusi.