> S’istòria de Claudio. Una laurea pigada de pagu e su bisu de diventai architetu | ilMinuto

S’istòria de Claudio. Una laurea pigada de pagu e su bisu de diventai architetu


(In Tempus de crisi) – Casteddu, 6 de su mesi de làmpadas – Claudio, classi 1986, dipromau in s’Istitutu Ténnicu Commertziali po Giómitrus e Lizeu Iscientìficu Tennològicu Angioy de Crabònia, agoa de su diproma s’est iscritu in s’Universidadi de Casteddu, primu a su cursu de laurea in Edilìtzia, e a pustis in Architetura po si pigai sa laurea magistrali. In su mesi de fiàrgiu passau su piciocu de Santu Antiogu lompit a su tìtulu, pigau cun su màssimu de is votus, e imoi est impignau in s’itùdiu po donai s’esàminu de Istadu, cosa chi ddu at fai diventai un’architetu, un’abilitatzioni indispensàbili po si podi propòniri in su mundu de su traballu. “Oi – si contat Claudio – tengu sa punna de ponni in pràtiga is notzionis achirias in annus de istùdiu grais meda, atressu de unu traballu chi m’apagnit de unu parri personali puru, chentza de acabai perou de arricai sa cultura mia. Pentzu difatis ca sa laurea no depat essi sa frimada finali de su caminu de annestru, ma chi donniunu depat sighiri a mellorai sa pròpriu conoscèntzia”. Epuru su piciocu no cuat is arragus de insertamentu in d-unu sistema de su traballu parau comenti est su de sa Sardigna: “is sacrifìtzius – si narat – no ispaciant cun sa laurea e is possibilidadis de impreu funt pagus e fatuvatu de pagu profetu”. Po custa arrexoni su giòvanu de Santu Antiogu no escluit de depi fai sa balìgia e pigai su bolu in circa de unu traballu chi ddu at a betiri atesu de sa pròpriu terra. Ma – aciungit cun indolimentu – “seu cumbintu ca su disterru de is giòvanus sardus siat una pérdida manna po sa Sardigna e po chini torrat puru, una bia lòmpia una determinada frimesa económica e professionali, su tempus passau atesu no torrat, e sa situatzioni lassada si torrat a agatai linta e pinta o impeurada”. A sa pregunta cali siant is problemas chi atopant is laureaus sardus, Claudio arraspundit ca intre is arragus ddoi at chentza de duda “sa cuncurrèntzia de su tìtulu pigau cun fatiga in campu natzionali e internatzionali”. A custu s’aciungint puru “is maneras de assuntzioni chi depint poderai is giòvanus laureaus. Cun totu custu “meda de prus in tempus de crisi – afirmat Claudio – is ideas de is giòvanus podint donai sa fortza chi abisongiat po fai torrai a partiri s’ecunumia, ma seus fueddendi de un’arrichesa chi benit prus isfrutada ca amparada e ispertada”.

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda


© RIPRODUZIONE RISERVATA

0 Risposte a “S’istòria de Claudio. Una laurea pigada de pagu e su bisu de diventai architetu”


I commenti sono chiusi.