> S’istòria de Roberto. Unu piciocu chi bisat de fai circa cumenti si depit | ilMinuto

S’istòria de Roberto. Unu piciocu chi bisat de fai circa cumenti si depit

(In Tempus de crisi) – Casteddu, 15 de su mesi de làmpadas – At istudiau mùsica e filosofia e agoa de ai acabau su caminu de istùdius, Roberto, classi 1972, at incumentzau a biaxai po aprofundai is conoscéntzias suas in is campus pigaus. Primu in Germania, agoa in Franza, in Ungheria e a s’acabada in Croazia. “Custa – si contat – furiat puru sa punna mia cùmius is istùdius, biaxai po podi fai esperiéntzias noas, imparai is lìnguas furesteras e avreguai unus cantu de abiléntzias”. Fueddendi de is tìtulus suus, su piciocu de Casteddu si narat ca sa laurea in filosofia ddu at betiu a traballai a foras de is làcanas de Sardigna,  in s’Istitutu de Cultura de Zagabria. “Difatis – si pretzisat – no ia ap’ai potziu inghitzai a traballai ingunis si no essi tentu una laurea umanistica, biu ca furiat cunditzioni essentziali po podi imparai s’italianu comenti L2″. E sighendi s’allega afirmat ca sa laurea ddu at lassau unu bagàgliu bellu meda de sabiduria e si marcat: “no tengu mùtrias po s’iscera fata ca est stétia de su cumentzu pretzisa e inevitàbili”. Arrexonendi de Sardigna e de is problemas chi ferrint a is laureaus sardus Roberto afirmat: “deu seu unu laureau “béciu” e no connosciu meda sa realidadi de is chi funt friscus de laurea”. E sighit: “Est fasciugu a nai ca mi ddus imazinu in barrancus circhendi logu po is pròprius spédius professionalis o de circa.Arragus ca de s’àteru pertocant a medas laureaus de sa ginia mia, e mi nci pongu aintru deu puru”. Allega allega ndi essit a pillu ca su piciocu casteddaiu pentzat ca su prus de is problemas funt fillus de is cursus de laurea nous ca a petus de is de s’ordinamentu béciu po issu donant prus pagu annestru e prus pagu meda tareas”. Po su tempus benidori suu Roberto tenit in progetu de binci unu bandu de circa europeu chi ddi permitat de guadangiai fadendi circa. E si narat: “prus de unu progetu est unu ispériu”. Fueddendi de tempus de oi, tenit in progetu, imbecis, concluit: “de sighiri a circai sabiesa chentza de tenni sa pretesa de diventai sàbiu”.

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda


© RIPRODUZIONE RISERVATA

0 Risposte a “S’istòria de Roberto. Unu piciocu chi bisat de fai circa cumenti si depit”


I commenti sono chiusi.