> Po cantu Bidhanoa | ilMinuto

Po cantu Bidhanoa

Venutu Lobina

Po cantu Bidhanoa

(Editzionis 2D Mesuterrànea, Castedhu-Tàtari 1987, pàginis 166/168)

Su Butegheri fut bessiu a Sa Pratzita, fut fendu tempus bonu. Ma deu creu ca fut Sa Pratzita chi dh’iat tzerriau, Sa Pratzita chi boliat intendi ancora is contus de calincunu chi fut torrau, de innui si siat chi essit torrau, fessit chini fessit.
Perou su fillu de Su Butegheri, prus de contai su ca iat fatu in Àfriga, iat dépiu arrespundi a is preguntas chi dh’iant fatu tres o cuàturu cumbatentis antzianus della ’15-’18, una spétzia de interrogatóriu:

“Deu no arrennésciu a cumprendi eita de arratza de guerra eis fatu bosàturus. In seti mesis anca eis conquistato tutto l’impero etiopico, cosa de nudha. Ma fut guerra de movimentu, o ita guerra fut?”

“Nareus ca fut guerra di movimento, s’Àfriga no est logu de dhu fàiri una guerra di posizione, che sa chi eis fatu bosàturus. Per lo più andiaus all’inseguimento dell’esercito abbissino o delle bande, apustis chi s’aviatzioni dhus iat mitralliaus”.“Tandu is cumbatimentus depiant èssiri stétius pagus…”.

“Unu generalli ingresu at nau che in una guerra coloniale può succedere di tutto, anche di combattere”.

“E cumenti armas, eita portiàis?”

“Is chi portiàis bosàturus: fucile 91 e mitragliatrice pesante Fiat 14, raffreddamento ad acqua”.

“E tui eita portàst?”

“Deu fua portatreppiede. Il treppiede pesàt bintunu chillus, gei dhu scieis”.

“Comenti dhu portàst?”

“Da Adigràt fintzas a Dessié, cincuxentus chilòmetrus, dh’apu portau a codhu, chentza de basto, alla bersagliera. Ma de Dessié fintzas a Addis Abeba seu andau scaùciu, fosili e cartùcias e tres bombas O.T.O., àturus cincuxentus chilòmetrus sémpiri a peis sotto le grandi piogge, prenu de priogu e mortu de fàmini. Ma sa guerra imoi fut giai acabbada, Badòlliu fut arribbau a Addis Abeba”.

“E de cudha battàllia manna di Amba Alagi, eita si contas?”

Su fillu de Su Butegheri dhu iat pentzau unu paghedhu, apustis, mancai de mala gana, iat arrespustu:

“Amba Alagi est unu monti che su Pitzu de Scangialis, ma prus artu e prus mannu, meda. Is abbissinus fuant in punta, e s’iant èssiri pòtzius diféndiri arrumbulendu perda e basta. Pariat una posizione imprendìbile. Ma fut intervenuta l’aviazione e gli aerei iant bombardau s’Amba Alagi punta e costeras acantu dhui biviat genti, con bombe a gas”.

“Eita gas?”

“Iprite”.

A is cumbatentis de sa quindici-diciotto cudhu fuedhu dhus iat sfridaus. Dhis iat arregordau s’ùrtimu annu de sa guerra, candu is tedescus iant cumentzau a ghetai s’iprite. Le maschere antigas no fut sémpiri chi serbiant, calincuna no portàt mancu filtro. E prus de unu nd’iat spudau is prumonis. E liàgas. S’iprite fut stétia sa peus cosa de sa guerra.

Is cumbatentis no iant fatu àtaras preguntas, e su fillu de Su Butegheri iat acabbau su contu cun su fuedhu maladitu. Poi ci fut torrau a domu, pentzamentosu: dhi fuant torraus a ogus is abbissinus di Amba Alagi, fuliaus pe parti di acantu fut passendu su batallioni, óminis féminas e pipius mesu spollìncus, cun is carris liagadas chi dhis pendiant de is cambas e de is bratzus, abruxadas. Citius, pediant agiudu cun is ogus, e tui caminàst bregungiosu circhendu de no dhus castiai, ca ti parìat curpa tua puru si fuant in cudhu stadu, ma imoi no podiast fàiri nudha po dhus agiudai. “Infermiere, non puoi fare qualche cosa, un po’ di pomata, una benda…”.

“Ma se non ho un cazzo, ho solo un po’ d’alcool. Ho provato a buttarglielo sulle piaghe e stavano diventando pazzi. Io non posso farci nulla, e tu fòttitene”.

Candu fut intrendu in domu, sériu, Tzia Pissentica dh’iat bistu e dh’iat castiau serrendu apena is ogus, cumente chi essit inténdiu su chi iat contau e dh’essit lìgiu aintru:

“Mi pàrit ca ti nd’est passada sa gana…”.

No iat arrespustu nudha. De sa birdiera serrada si biat Sa Pratzita, deserta in su scoriu chi fut calendu, muda, spramada.

francudefabiis

© RIPRODUZIONE RISERVATA

0 Risposte a “Po cantu Bidhanoa”


I commenti sono chiusi.