> Biàgios: su progetu editoriale nou de IlMinuto notizie Mediterranee | ilMinuto

Biàgios: su progetu editoriale nou de IlMinuto notizie Mediterranee

(IlMinuto) – Casteddu, 1 de abrile – S’at a tzerriare Biàgios. Est custu su tìtulu chi amus donadu a su progetu editoriale nou de IlMinuto notizie Mediterranee. Cun una gràfica garbosa, immàgines esclusivas, argumentos modernos, testos chi ingòlumant a lèghere e consìgios ùtiles pro is biàgios, sa rubrica noa de su giornale in lìnia nche l’amus pensada gràtzias a un’istùdiu atentu a pitzu de is interessos possìbiles de is giòvanos.

Segundu un’indàgine chi at fatu su Cts intre unu campione de 306 persones, difatis, is pitzocos cumentzant a biagiare dae is 16 annos, e su biàgiu, cun totu su chi nd’essit a pitzu, comente crèschida de su nùmeru de persones connòschidas e de sas istòrias de pòdere contare, est su tzentru de is interessos de is pitzocos de cussa edade, chi sunt bastante mannos e autònomos pro si pòdere permìtere unu biàgiu chene chi los depant acumpangiare su babbu e sa mama.

Duncas Biàgios punnat a arribare a unu pùblicu de persones giòvanas, mescamente istudiantes de is iscolas superiores e de is primos annos de s’Universidade, gràtzias a unu argumentu interessante e cun sa possibilidade de retzire totu is noas de sa rubrica impreende una aplicatzione chi si podet isgarrigare de badas in su telefoneddu o in su tablet

S’argumentu, chi faghet leare gustu a sa letura, at a èssere s’ocasione pro lòmpere a duos obietivos: fàghere in modu chi is prus giòvanos legant in sardu, faghende-lis cumprèndere chi est una limba normale; e fàghere in modu chi cumprendant a sa sola chi sa limba sarda at sa pròpiu dignidade de s’italianu, de s’inglesu, de su frantzesu e gasi sighende.

In prus, cun su dispositivu mòbile chi is prus giòvanos si giughent semper in fatu, at a èssere prus fàtzile lòmpere a s’obietivu, agiuende s’impreu de sa limba sarda comente còdighe bonu pro totu sas situatziones in ue s’impreat una limba moderna.

Chi si faeddet de biàgios in sos istados istràngios, de bisitare una mustra de fumetos, de biàgios intre s’ìsula pro bìdere eventos particulares o de una vacàntzia de pagu tempus in mare, su fine est semper su pròpiu: contare in limba sarda paesàgios, culturas e itineràrios possìbiles.

Biàgios, difatis, si proponet comente unu cuntenidore temàticu in ue ant a agatare logu: propostas de itineràrios, contos de biàgiu regortos cun intervistas cuncordadas dae sa redatzione, propostas de biàgios de istùdiu pro imparare una limba, o biàgios finalizados a traballare faghende unu stage pro unu tempus prus o mancu longu a tesu dae domo.

Is artìculos nche los amus a presentare intre unu cuadru pintadu cun immàgines e cumpositziones fotogràficas de panoramas e logos de incantu.

Una “carta de identidade” de ogni logu at a èssere publicada comente corollàriu de ogni artìculu e at a permìtere de connòschere totu is informatziones ùtiles.

Ogni artìculu chi amus a iscrìere at a serbire comente una guida minoredda pro permìtere a is utentes chi l’ant a lèghere de pòdere partire pro su biàgiu issoro preparados e informados.

Duncas Biàgios si bolet presentare comente una rubrica giornalìstica chi funtzionat che a unu ponte tra su giòvanu chi biàgiat e su logu a ue bolet andare.

Su progetu at a èssere realizadu cun is critèrios de is tecnologias noas e de su web 2.0, chi, at a agiuare a crèschere sa sinergia intre sa limba sarda e is imbentos noos de sa tecnologia. Biàgios at a permìtere: sa letura in sardu de is artìculos de aprofondimentu; is cummentos in sardu dae parte de is utentes chi s’ant a registrare in sa rubrica; de èssere lèghidu impreende is dispositivos mòbiles (telefoneddos portàtiles, tablet etc.) gràtzias a una app de isgarrigare in su telefoneddu o in su tablet.

In totu 48 artìculos in 4 meses ant a acumpangiare tres bortas a sa chida is letores de su giornale in lìnia. Issos ant a èssere fatos prus “licantzos” siat dae s’immàgine chi at a acumpangiare ogni artìculu, siat dae su fatu chi Biàgios, at a frunire ogni artìculu de sa rubrica cun una “carta de identidade” in ue b’ant a èssere is informatziones ùtiles chi pertocant su logu de su biàgiu cunsideradu.

Su progetu Biàgios previdit s’impreu de is normas de referèntzia seberadas cun sa Delìbera n. 16/14 de su 18.04.2006, gasi comente bolet su Pianu triennale 2011-2013 aprovadu cun Delìbera n. 46/47 de su 16.11.2011 e dae su Pianu de agiustadura annuale 2013 aprovadu cun sa Delìbera n. 31/3 de su 30.07.2013.

Unu banner in sa home page de su situ ìnternet at a permìtere de intrare a sa lestra in sa presentatzione de su progetu e in sa pàgina de ogni artìculu, chi a borta a borta at a abbarrare disponìbile in sa prima pàgina de su giornale.

Biàgios at a èssere parte de su progetu editoriale de IlMinuto notizie Mediterranee e totu su materiale publicadu at a abbarrare in s’archìviu de su giornale.

Pro inscarrigare sa app in su telefoneddu o in su tablet, faghere click inoghe dae su telefoneddu o dae su tablet.



© RIPRODUZIONE RISERVATA

0 Risposte a “Biàgios: su progetu editoriale nou de IlMinuto notizie Mediterranee”


I commenti sono chiusi.