> Unu biàgiu a pustis de su diploma, a Gallipoli | ilMinuto

Unu biàgiu a pustis de su diploma, a Gallipoli

(IlMinuto) – Casteddu, su 24 de maju – Gallipoli, est a nàrrere sa “tzitade bella”. Difatis est pròpiu sa bellesa su caràtere chi faghet custa tzitade in sa provìntzia de Lecce, in su Salentu. Gallipoli est unu paradisu de connòschere, unu logu ùnicu e galanu. Rocas bassas in s’oru de su mare, plajas galanas, monumentos istòricos istraordinàrios. Custa est Gallipoli, sa “perla bera de su mare Iòniu”.
Un’idea de vacàntzia ùnica, un’esperièntzia mala a ismentigare. Gallipoli, difatis, est una tzitade ispetziale de bìdere, unu logu de connòschere andende a fùrriu in iss carreras suas!
Gallipoli est in sa costa otzidentale de su Salentu e arribende is biagiadores la bident in una forma chi no agatant in medas tzitades.

Sa tzitade de sa provìntzia de Lecce est partzida in duas perras: subra un’isuledda b’est sa tzitade betza, chi est su Tzentru Istòricu, e unu ponte la unit a sa terra firma, in ue est su Burgu, chi est sa parte prus noa de sa tzitade.

Fintzas si su Salentu atirat ogni annu mìgias de persones pro is abbas lìmpias e is plajas chene fine, custu logu lu sèberant semper de prus is giòvanos mescamente pro s’ispàssiu! Gallipoli est unu logu chi non bolet pèrdidu: ogni die bos podeis godire is aperitivos de leare in sa plaja matessi, chenas abbundantes de pische e notes istravanadas in is club de sa zona!

In is dies de vacàntzia a Gallipoli bos cussigiamus de dedicare su mangianu a su mare de sa plaja “Baia Verde”. Custa zona a de note diventat su logu de sa movidagràtzias a is diversos locales; is prus nòdidos sunt su Lido Zen e su Samsara Beach.

Gallipoli però no est isceti discotecas, pro ite ca sa tzitade est interessante pro sa cultura sua puru.

Partende de cursu Roma agatamos “Seno del Canneto”, su Portu betzu. A s’inghizu de su portu si podet ammirare sa Funtana Greca, dae in ue andare a su ponte a arcos. Su ponte e s’intrada a sa tzitade fortificada sunt dominados e controllados de su Casteddu Aragonesu e de su Rivellino. A palas de su casteddu, in Pratza Imbriani, s’agatat su mercadu de s’Otighentos. Pratza de sa Repùblica puru, impare a carrera Antonietta De Pace, depiat serbire comente logu pro su mercadu. Abarrende in carrera De Pace lompimus a su Molinu Ipogeo de Palatzu Granafei.

De bìere galu: sa Catedrale de Sant’Agata (carrera Duomo), sa crèsia de San Francesco d’Assisi (carrera Alessandro Raimondo Pasca), sa crèsia de Santa Maria degli Angeli (carrera Kennedy). Acanta ddoe at sa crèsia de su “Crocifisso” e sa crèsia de San Domenico al Rosario.

Pro mandigare bos cussigiamus su restorante  ”Il Tramonto” (carrera Antonietta De Pace)

Bos bolides regalare unu biàgiu a pustis de su diploma prenu de ispàssiu, cultura e chene pensamentos? Tando custa tzitade est su logu giustu pro bois!

Fotografia de Francesca Special K pigada de Flickr

Carta de identidade de su logu


© RIPRODUZIONE RISERVATA

0 Risposte a “Unu biàgiu a pustis de su diploma, a Gallipoli”


I commenti sono chiusi.