> Una vacàntzia in bitzicleta: in Bruges « ilMinuto – notizie Mediterranee – edizione Sardegna

Una vacàntzia in bitzicleta: in Bruges

(IlMinuto) – Casteddu, su 5 de làmpadas – A bos diat agradare unu biàgiu in Bruges?
Sa regione chi est tra sa costa belga e sa tzitade galana de Bruges est una zona ispetziale de bìdere: in cue si girat in pistas pro sas bitzicletas o in caminos seguros chi colant in mesu a sa natura bìrghine e birde, tra sos montigros de arena in sa costa, sos “polder”, sos canales e sos logos e tzitades comente Ostenda e Bruges.

Bruges est una tzitade rica meda pro sa sienda artìstica sua e totu cussas bellesas si podent bìdere in sos museos o in sas espositziones in foras dae custos e in sos palatzos e monumentos de sas carreras de sa tzitade.

In custa tzitade pitica e incantada bi sunt paritzas atratziones. Unu biàgiu a custos logos de su Bèlgiu, difatis, est fintzas unu biàgiu in mesu a sos sabores. Depeis ischire chi sa coghina belgiana at torradu a imbentare sa traditzione gastronòmica lacanàrgia frantzesa in una manera originale meda, adatende•la a sos produtos tìpicos de su territòriu suo.Monumentos de s’arte culinària belgiana sunt su tziculate, sa birra, sos wafels e sas patatas frissas, chi segundu su chi narat sa traditzione nche las ant imbentadas in cue. Su pratu chi bos cussigiamus de tastare est su flemish stew.

Tzitade medievale e romàntica, Bruges est una prenda de fotografare. Capitale culturale cummertziale, sa tzitade est famosa pro sas trinas suas.

Bos cussigiamus de visitare su Markt, sa pratza in su coro de Bruges in ue s’agatant architeturas de importu comente su Belfort e sa Corte ProvintzialeCollegadu a su Markt est su Burg. De bìere puru sa zona de su mercadu de su pische (Vismarkt) e sos museos Groeninge museum e Sint John museum. Custu s’agatat intro de s’ispidale betzu.

Sas crèsias de visitare sunt: St. Saviour, St. Jacob, St. Gilles e sa crèsia de Notre Dame.

Bellu est girare intre sos canales e a foras de sa tzitade. Bos cussigiamus un’itineràriu chi partit dae Daamspoort e sighit su canale chi unit Bruges a Damme pro lòmpere a Slois, in Olanda.

Bruges est fata a posta pro si mòvere cun sa bitzicleta. Ogni istrada, difatis, tenet corsias pro sas duas arrodas. Bos donamus unu consìgiu: de nolegiare sas bitzicletas in Ezelstraat, de Snuffel, o in tzentru, de Eric Popelier (in Mariastraat).

Duncas custu biàgiu in bitzicleta est su giustu pro pitzinnos e pitzinnas chi lis praghet a pedalare cun sas duas rodas: mare e arena, sa sienda culturale, sas còmporas in Bruges, sas biddas caraterìsticas arrimadas in su mudìmene, màndigu de si lìnghere sas laras e caminos e pistas pro bitzicletas chi rugrant unu paesàgiu galanu!

Carta de identidade de su logu


© RIPRODUZIONE RISERVATA

0 Risposte a “Una vacàntzia in bitzicleta: in Bruges”


I commenti sono chiusi.