> Biàgiu a sas Astùrias, in s’Ibèria prus birde | ilMinuto

Biàgiu a sas Astùrias, in s’Ibèria prus birde

(IlMinuto) – Casteddu, su 12 de argiòlas – Su chi bos cussigiamus oe est unu biàgiu a unu paradisu a beru.
Cale est su logu? Sas Astùrias: unu territòriu in sa costa nord-atlàntica de sa penìsula ibèrica, a oriente de sa Galìtzia e a ponente de sa Cantàbria.
In cue ais a bìdere padentes mannos e su colore birde bos at a prenare sos ogros pompiende totu sos paesàgios incantados chi ais a agatare. Pro custa resone sas Astùrias sunt connotas comente unu paradisu naturale.
Sa costa asturiana ammentat s’Irlanda: sos prados e sos padentes suos lompent finas a s’otzèanu.

Bos cussigiamus unu biàgiu a Oviedo, chi at unu tzentru istòricu medievale torradu a regulare in època moderna cun unu disignu urbanu fàtzile de girare. Oviedo difatis est su logu giustu si cherides bìdere esèmpios de s’arte preromànica, e custa est una de sas resones chi l’ant fata diventare Patrimòniu de s’Umanidade.

Su coro istòricu de sa tzitade est rapresentadu de pratza de sa Catedrale. Inoghe s’agatat pròpiu sa Seu, su monumentu religiosu printzipale de Oviedo. In sa Catredrale si podet ammirare sa Rughe de sa Vitòria, sìmbulu de sa regione asturiana. In sa pratza s’agatat puru su Museu Archeològicu de sas Asturias. A pagos metros, in Calle de Santa Ana, si podet visitare un’àteru museu, su Museo de Bellas Artes. A curtzu podides arribare deretu a Plaza de la Constitucion. Custa pratza nch’est su Munitzìpiu e su Mercadu de El Fontan. Acanta s’agatant puru sas carreras printzipales de sa tzitade, in ue fàghere còmporas e mandigare. Pro su màndigu bos cussigiamus de andare a su Llagar Gea (Carretera de Colloto).

Àtera pratza de su tzentru istòricu de bìere est Plaza de la Escandalera. A probe si podent visitare su Palatzu Regionale de sas Asturias, su Cumbentu de Santa Clara, s’Universidade antiga e su Palatzu de Camposagrado.

Sa tzitade noa imbetzes est cussa chi s’isvilupat a inghìriu de Calle de Uria e Calle de su Conde de TorenoMescamente in sos fines de chida custos sunt sos logos preferidos pro sas còmporas e pro caminare. A livellu artìsticu est interessante s’Ispidale Provintziale antigu.

Totu sa tzitade de Oviedo si podet bìere andede a pee, ma pro lòmpere a nord, in ue bos cussigiamus una visita a sas crèsias de Santa Maria e de Santu Miguelintre sas prus bellas de totu sa regione e decraradas Patrimòniu de s’Umanidade dae s’Unesco, depide leare su postale L10 dae Calle Uria, a curtzu de s’istazione de sos trenos.

Dae Oviedo bos podide mòere cun sos postales dae Plaza Primo de Rivera 1 pro andare a su litorale de sa Costa Birde, in ue b’at paesàgios naturales istravanados e in ue podides praticare ogni tipu de isport.

Ais a tastare finas màndigos tìpicos chi sunt licantzos a beru, girende tra sas biddas medievales e sos sartos galanos chi bi sunt a inghìriu, ca sa coghina asturiana meresset de èssere cunsiderada bene meda, comintzende dae su bumbu alcòlicu tìpicu, chi est su chi diant bufare sos Deos si fiant istados in cue: su sidro.

Bos bolides regalare unu biàgiu ispantosu, de ispàssiu e de cultura? Tando custu est unu logu chi non bolet pèrdidu, est su giustu pro bois!

Carta de identidade de su logu

© RIPRODUZIONE RISERVATA

0 Risposte a “Biàgiu a sas Astùrias, in s’Ibèria prus birde”


I commenti sono chiusi.