> Morti arba | ilMinuto

Morti arba

(IlMinuto) – Casteddu, 20 de su mes’e làmpadas – Mi ndi seu pesau de pagu. Apu apariciau totu cantu in sa mesa po murzai. Su gioddu, su lati, su cafeu, sa fruta, biscotus e àcua.
Apu allutu sa televisioni, po ascurtai calencuna nova in antis chi incumentzit sa giorronada.
E is novas arribbant luegus: novas chi mi pìtziant, chi mi pungint su coru de a mengianu e chi, incapas, m’ant a abarrai infrissias a totu dì.
Un’òmini est mortu trabballendi. Una spina si carvat in su coru.
A pustis nci pentzat su comentu de su giornalista a mi ndi fai bessiri su sànguini fadendiddu artziai deretu deretu a conca: “Torna l’emergenza delle morti bianche”.Torrat?! S’emergèntzia?!
Apu cumprèndiu: sigumenti de s’ùrtimu chi est mortu si ndi festus giai scarèscius, giustamenti custa morti no si dd’abetastus. E cumenti a totus is emergèntzias custa puru si strobbat, si fait torrai un’ispeci de gana mala chi pentzastus de ai lassau a una parti.
Poita candu morit unu trabballendi sutzedit sèmpiri unu casinu, antzis, fadeus totus unu bellu stragatzu: servìtzius in su tigì, dichiaratzionis de ministrus, de sindacalistas, intervistas, promissas e impènnius mannus de is partidus.
Su Presidenti de sa Repùblica puru ndi chistionat. Ecus: ndi chistionat. Totus ndi chistionant. Po duas o tres diis. A pustis no s’intendit prus nudda. Nisciunus ndi chistionat prus.
E totus is chi ant chistionau, chi si funt fatus intervistai, chi ant artziau sa boxi, fadendi biri de èssiri incatzaus de a berus, “custa borta fadeus a su sèriu”, apustis de ai chistionau, no faint nudda.
No fadeus mai nudda nos.
Poita ca s’interventu prus mannu e prus forti contras a sa morti arba, in Itàlia, est de sperai e pregai chi no sutzedat prus.
Sa morti arba est frida e muda che su màrmuri.
Est unu lentzoru, chi cuat totu.
Amen.

Scritu a pustis: a su chi scireus, ocannu, in Itàlia, funt giai 274 is chi funt mortus fadendi su trabballu insoru.
4 in Sardìnnia (fonti: Osservatòriu Indipendenti de Bolònnia).
Cuàturu funt puru, a su chi scireus, is acidentis chi funt incapitaus in is cavas de màrmuri de Orosei, in is primus ses mesis de su 2015, duus sceti su 10 de su mesi de làmpadas.
In Orosei su 13 de martzu de su 2014 est mortu Antonellu Garau, 25 annus.
In Orosei su 21 de su mesi de idas de su 2013 est mortu Michal Knap, 51 annus.

Cristian Urru

© RIPRODUZIONE RISERVATA

0 Risposte a “Morti arba”


I commenti sono chiusi.