> Birras de s’àteru mundu: 4Mori, sas bèvidas chi faeddant de Sardigna « ilMinuto – notizie Mediterranee – edizione Sardegna

Birras de s’àteru mundu: 4Mori, sas bèvidas chi faeddant de Sardigna

* Dae sa terra a sa butìllia * – 30 ghennàrgiu 2020 – Un’atzienda ecu-sustenìbile chi abbàidat a su benidore cun unu progetu chi respetat e avalorat su territòriu. Semus faeddende de su birrifìtziu 4Mori, chi at sa sede sua in sas minieras de Monti Bèciu, in intro de su Parcu Geominerario de sa Sardigna. Pro sa pretzisione l’agatamos in s’istrutura de s’ex-tzentrale elètrica. Difatis, su de 4Mori est un’esèmpiu bellu de recunversione industriali de un’edifìtziu de su 1909.

Su birrifitziu naschet dae unu bisu simple, est a nàrrere produire birra màstrina de calidade. Gasi est diventada realidade s’idea de sos duos amigos Pàulu Lai e Antoni Zanda: sa de mudare sa curiosidade e s’amore issoro pro s’istòria de sa produtzione de birra màstrina in unu produtu chi faeddat de su territòriu de su Campidanu de Mesu.

Oe su birrifìtziu at puru àteros duos sòtzios: su mastru birràiu Mathias Müller e su mastru birràiu e maldatore Fabio Serra. Su fundamentu de totu sa produtzione 4Mori tenet raighinas in su Reinheitsgebot (s’editu de puresa bavaresa), unu documentu de su 23 de abrile de su 1516 chi regulamentaiat sa produtzione e sa bèndida de birras in Baviera.

Custu bisu birràiu tenet conca in su tempus coladu e cherret a si projetare in su tempus benidore.

In s’ìnteri su birrifìtziu est lòmpidu a impitare su trigu de su logu e sas castàngias de su Gennargentu, mentras oe at sa punna de impreare semper de prus sas energias rinnovàbiles.

Batigiadas cun su nùmene Pozzo, sas 4Mori sunt birras chi ant otènnidu prèmios meda. Intre sos ùrtimos sa Pozzo 16 in su 2019 at àpidu su prèmio “birra de s’annu” in sa categoria 2 (birras de ispiratzione tedesca pagu buddida in su cubone e cun gradu bassu de alcol).

Dae ue benit su nùmene Pozzo? Custa paràula cherret inditare sos putzos de estratzione de sa miniera.

Bisòngiat de nàrrere ca onni birra naschet de ingredientes de primore. Sunt pròpriu sos ingredientes sa fortza de sa produtzione de 4Mori. Pro lu cumprèndere est bastat a pensare ca pro sa chirca de sa mègius abba (chi comente importàntzia est su primu ingrediente de sas birras Pozzo), sos mastros birràios ant cumpridu unu traballu de chirca atentu e pretzisu. Custu lis at fatu agatare s’abba cun sas caraterìsticas organolèticas e de calidade prus bona pro su tipu de birra chi proponent a sos clientes. Semper e cando s’issèberu de sos àteros ingredientes puru est fatu chirchende sa calidade prus arta. Feti gasi si lompet a produire birra de sa mègius calidade. Difatis Pozzo 16, Pozzo 5, Pozzo 9, Pozzo 8, Pozzo 20, Pozzo 3 e Pozzo 25 sunt birras chi si contant dae se.

© RIPRODUZIONE RISERVATA

0 Risposte a “Birras de s’àteru mundu: 4Mori, sas bèvidas chi faeddant de Sardigna”


I commenti sono chiusi.