Lara: birras bonas meda chi cherent bufadas

Dae su 2009 birras mastrinas chi naschent in Tertenia
23 Gennàrgiu 2020
lara

* Dae sa terra a sa butìllia * – Sa birra Lara naschet in Tertenia dae un'idea de Giovanni Piroddi e Francesca Lara. Fiat su 2009 cando Giovanni e Francesca ant fatu de s'amore pro sa birra su traballu issoro. Sunt 11 annos, duncas, chi su mastru birràiu e sa mastra birràia produent birras cun una retzeta imbentada dae issos etotu.

Sas birras Lara bogant a campu nuscos e sabores chi donant a chie ddas tastat sensatziones de gosu e de allegria.

Sunt birras cruas sena coladas e pro ddas prodùere si impreant s’abba lìmpia de sa mitza de Santu Perdu, maltu e trigu de primore.

Giovanni e Fracesca produent issos etotu su trigu Cappelli chi impreant pro sa produtzione de sa birra bianca "Del Senatore", ispirada a s’istile belga. In s'azienda si produent puru sos lùpulos chi sunt impreados pro fàghere sa birra Rubja e pro sa birra Tzar.

In su 2011, su Birrifìtziu Lara est diventadu Birrifìtziu Agrìcolu.

Dae su brand Lara, chi at su nùmene de su sambenadu de Francesca, sunt istados creados oto tipos de birra, distìnghidas in clàssicas e ispetziales.

Sas clàssicas sunt: sa Rubja, una birra ruja ispirada a s’istile inglesu, nuscosa e marigosa pro su lùpulu meda; sa Tzar, una brunda in istile inglesu cun tessìngiu lèbiu de sabores e bilantziados cun su lùpulu; sa W16, una brunda de trigu a colore de madreperla, fragulosa e ispirada a s’istile bavaresu; in fines, sa birra de su "Senatore", bianca e fata cun trigu Cappelli sena de maltu.

Sas birras ispetziales sunt sas bator sorres famadas, totus acumonadas de un'ingrediente: su maltu de trigu. S'idea est nàschida pro propònnere a su mercadu bator birras ispiradas a sa figura de bator fèminas. Duncas, su mastru birràiu Giovanni e sa mastra birràia Francesca si sunt ispirados a sas bator sorres de sa famìlia Lara. Frantzisca etotu est sa de bator.

Onni sorre at caraterìsticas suas e personalidade diferente comente sas birras chi las rapresentant: Affumiada est una birra morita fata de maltu de òrgiu e de trigu afumiadu; Sennora est una ruja firma, de gradatzione prus arta e su sabore suo ammentat su de sa frùtora; Piculina est una birra a colore de pinnadellu, fàtzile de acrobare cun antipastos de mare e de terra; Moretta est una morita de trigu turradu, bona a l’acumpangiare cun petza e durches.

A sas birras mentovadas s'agiunghet s'ùrtima creatzione de su birrifìtziu, sa Donbat, una birra gluten free lichitosa meda, chi podent bufare fintzas sas persones intollerantes a su glùtine.

Sas birras Lara sunt istimadas meda dae sos chi chircant unu sabore sentzillu e nuscos bene bilantziados. Pro custa resone paritzos chef las impreant in coghina comente ingrediente ispetziale de sas licantzas issoro.

© RIPRODUZIONE RISERVATA

Dae sa terra a sa butìllia

Progetu realizadu cun sa partetzipatzione de sa Regione Autònoma de Sardigna – L.R. LR 22/2018, art. 22

Image
Regione Autonoma Sardigna

Aciungi unu cumentu