> Impitu militari de su portu de Casteddu: sa protesta de A Foras « ilMinuto – notizie Mediterranee – edizione Sardegna

Impitu militari de su portu de Casteddu: sa protesta de A Foras

14 de fiàrgiu – Est stètia presentata mèrculis 11 de su mesi de fiàrgiu s’interrogazione chi pertocat a sa transida de materiali de gherra de produtzioni RWM in is carreras de su comunu de Casteddu.
S’iscopu
est de cumprèndiri calisiat s’atentzioni chi tocat a ponni in su casu de intzidentis, calisiant is pianus de emèrgentzias programaus, ma fintzas cumprèndiri su pentzu de sa giunta comunali asuba de sa faina de sa fabrica de Domunòas.

In custa circustàntzia A Foras, movimentu contra s’ocupatzioni de sa Sardigna, at lamau unu pichetu a foras de su comunu po denuntziai su discùidu de is istitutzionis a faci de argumentus comenti sa seguresa, s’ambienti, su tràbicu in is carrelas e su movimentu de armas. Ant pigau parti a sa protesta diversus pardidus polìticus, sindacaus e tzitadinus.

“A cantu parrit – afirmat A Foras – in totu su tretu tzitadinu non ddoi at unu pianu de seguresa po cantu pertocat a su movimentu de materialis de gherra: is autocarrus pagaus de sa RWM funt acumpangìaus de duas automòbilis de propriedadi de una dita privada. Non ddoi at nisciunu pianu de emergèntzia s’in casu mai is nais a incotzada nucleari iant a depi ocasionai intzidentis, o puru chi  una caravaza de veìculus militaris tengat arragus de atraessamentu in is carreras de su tzentru o in is caminus istatalis sardus”.

A Foras, duncas, pedit seguresa, arrespetu po s’ambienti e po is pòpulus allupaus de is gherras. “Asigeus – si ligit in nd’una nota – ca is terrenus ocupaus de is fainas de gherra siant torraus a is meris, a is casteddaius e a is casteddaias”.

© RIPRODUZIONE RISERVATA

0 Risposte a “Impitu militari de su portu de Casteddu: sa protesta de A Foras”


I commenti sono chiusi.