> Mezzavia sa poesia de sa birra « ilMinuto – notizie Mediterranee – edizione Sardegna

Mezzavia sa poesia de sa birra

* Dae sa terra a sa butìllia * – Sa birra màstrina Mezzavia naschet in su 2014 dae unu progetu de duos homebrewers, Giuannemiali Deiana e Lisandru Melis.
Su nùmene Mezzavia est leadu dae sos versos de sa poesia “Dopo la tristezza” iscrita in su 1912  dae Umberto Saba. In tames, Mezzavia inditat puru s’istile de su mastru birràiu Lisandru Melis. Sas birras suas, difatis, ant sa capatzidade de satisfàghere a totus, finas a sos tastadores de professione.

Su birrifìtziu de Ceraxius incumentzat sa produtzione sua posca duos annos de istùdiu. A tempos de oe produit deghe birras in ampudda e duas in tamburlana pro su mercadu de sos tzilleris.

Cun un’impiantu de 600 litros e una cantina de 720 litros, su birrifìtziu previdet un’elaboratzione a su nessi de 45 dies, cun una cumpridura a temperadura bassa chi durat meda in intro de sos tank (una genia de chisterras de atàrgiu). In fines sa birra Mezzavia torrat a buddire in sas ampuddas. Custu protzedimentu donat a sa bèvida una gasadura naturale. Sas de Mezzavia sunt birras echilibradas chi non sunt pastorizadas e mancu coladas. Semus faeddende de unu produtu biu, chi at una personalidade manna.

Onni birra Mezzavia est contivigiada in totus sas fases de sa produtzione, e difatis sunt bèvidas de calidade, chi ant àpidu luego resèssida in sos cuncursos.

Su birrifìtziu est galu giòvanu ma tenet ideas craras e gana de crèschere. Sa produtzione faghet riferimentu a istiles pretzisos e non si faghet imgaddinare dae sas modas. Su resurtadu sunt birras netas e crispas.

Clàssicas, ispetziales e de istajone, sas birras Mezzavia sunt una prus bona de s’àtera.

Intre sas clàssicas agatamus sa birra Lunamonda, sa Meridie, sa Gare de Roubaix, sa Malacoda e sa Nautilus.

Lunamonda est una birra de istile Blanche cun meda incubonadura. Una bèvida frisca e beverina chi bogat nuscos de ispètzias. Una birra totu de gosare. Produida cun lùpulos de primore Lunamonda at pagu aghedùmene e una gasadura sena esageratzione, chi dda faghent una birra perfeta pro la bufare comente aperiente.

Meridie, imbetzes est una birra de istile Belgian Blond. Cun sos 5,6 grados suos custa birra puru est una bèvida cun meda incubonadura. Caraterizada de tzinnos de mele e nuscos de frùtora. Meredie est una birra chi naschet dae lùpulos chi lompent dae su Bèlgiu chi li cunferint unu sabore amarghitu.

Gare de Roubaix est una birra a colore de pinnadellu, fermentada meda. Ispirada a s’istile Bière de Gard, est a nàrrere a sas birras tìpicas de sa traditzione birràia de sa Franza de susu. Gare de Roubaix est una birra bella càrriga, produida cun lùpulos tedescos de primore e maltos craros e a colore de pinnadellu, totus ingredientes chi li donant unu sabore marigosu e elegante.

A s’imbesse sa clàssica Malacoda est un’interpretatzione Mezzavia de sas  birras in istile Belgian Strong Ale. Custa bèvida beverina e cumpata at nuscos crispos de frùtora a purpa groga cun pira e pèssighe isciropada, e atzinnos prus marcados de banana e àghina bianca.

A serrare sa rassigna de sas clàssicas est Nautilus, una birra chi faghet onore a s’istile Imperial Stout. Custa bèvida est una birra a colore nieddu e at nuscos complicados, chi at sa capatzidade de pigare sos fragos de sos agrumes. Nautilus est una birra de riflessione perfeta pro s’ierru.

Sunt diversas meda Resoa, Abba Druche, Fuzz Tone, Slap Shot e Overdrive: sas birras ispetziales de Mezzavia.

Resoa est una bèvida chi naschet pro acumpangiare sos sabores de Sardigna, cumentzende dae sas bonidades de sa massaria e de sa pastoria. Una birra de trigu chi s’ispirat a s’istile American Wheat. Resoa est una birra lenta e bilantzada produida cun lùpulos americanos e trigu maltadu.

Ispirada a s’istile Munich Helles, Abba Druche est una birra beverina perfeta pro s’istiu. Produida cun maltos Pils e Carapils e cun lùpulos tedescos est una birra bene bilantziada intre marigosu e durche, cun nuscos marcados de frùtora e tzinnos erbantzos.

Sa birra ispetziale Fuzz Tone est una Oat Session IPA produida cun maltos craros e avena. Bene lupolada cun Huell Melon, Nelson Sauvin e Ekuanot, custa bèvida est una birra beverina e bilantziada cun tzinnos de limone e melone.

Lupolada cun Topaz, Nelson Sauvin, Amarillo ed Ekuanot, sa birra Slap Shot est una Session IPA fata cun maltu Maris Otter chi at unu bonu sabore marigosu.

Serrat sa sèrie de sas birras ispetziales sa Overdrive, una Double Blanche cun nuscos de agrume, beverina e marigosa. Custa birra est produida cun lùpulos Styrian Cardinal e Mandarina Bavaria feti in tamburlanas Polykeg.

A concruire sa produtzione Mezzavia sunt sas duas birras de istajone, sa Primula e sa Line Up.

Sa Primula est una bèvida chi s’ispirat a s’istile Pilsner tedescu. Nàschida pro alabare su beranu, est una birra pagu buddida, fata cun maltu de òrgiu e lùpulos friscos friscos. Primula est una birra chi at unu tastu marigosu lichitu.

Sa Line Up imbetzes est una birra Pale Ale prodùida cun maltu de calidade Maris Otter e naschet pro èssere bèndida feti in tamburlana.

Gràtzias a s’istùdiu fitianu chi ghiat su traballu in su birrifìtziu Mezzavia, cuddas birras ant bìnchidu prèmios meda.

Progetu realizadu cun sa partetzipatzione de sa Regione Autònoma de Sardigna – L.R. LR 22/2018, art. 22

© RIPRODUZIONE RISERVATA

0 Risposte a “Mezzavia sa poesia de sa birra”


  • Nessun commento

Lascia una risposta