> ilMinuto – notizie Mediterranee – edizione Sardegna

Cantina Canneddu: binos sanos, binos chi contànt su territòriu mamujadinu

* Dae sa terra a sa butìllia * Est nàschida in Mamujada dae su disìgiu de mudare s’amore pro sos binos in unu traballu. Semus faeddande de sa Cantina Canneddu, chi produit Cannonau dae prus de barant’annos e Grannatza dae deghe annos pagu prus o mancu.

A su printzìpiu de custa istòria de amore ddoi at unu bingiateri, Tziu Boelle Zibbo, chi traballàt sas bìngias suas cun passione e aficu. Tziu Boelle at imparadu su traballu e s’amore suos pro sa coltivatzione de sas bides a su fìgiu Toninu. A pustis, Marcu, nebode de Tziu Boelle e fìgiu de Toninu, at istudiadu in s’Universidade de Aristanis e est diventadu enòlogu. Gosi, in su 2015 est nàschida sa Cantina, una realidade chi est su frutu de un’idea crara: sa de fàghere binos de calidade manna.

Totu custu pro nàrrere ca s’istòria de sa Cantina Canneddu est s’istòria de una famìlia e ca sos produtos suos sunt sos frutos de s’unione de sa traditzione cun s’innovatzione. Continua a leggere ‘Cantina Canneddu: binos sanos, binos chi contànt su territòriu mamujadinu’

Sa Corona de Logu faghet chimbe pregontas a su guvernu de sa Regione Autònoma de Sardigna

Publicaus su documentu integrali de sa Corona de Logu.

Sa Corona de Logu ponet chimbe pregontas de importu a su guvernu de sa Regione Autònoma de Sardigna. In antis de pigare positzione subra sa metanizatzione de s’ìsula, comente amministradores locales indipendentistas cherimus craresa subra s’argumentu.

Sos tzitadinos de sas comunidades nostras cada die nos pregontant su chi amus antitzipadu in antis e pretendent de ischire sas rispostas. Sas rispostas, però, mescamente subra unu tema comente custu, las podimus dare petzi a pustis de un’istùdiu fungudu e de una valutatzione realìstica, non ideològica e non afarìstica, de sos bisòngios de sa Sardigna e de sos abitantes suos. Bisòngios de su presente e de su cras: non nos nche podimus ismentigare chi custa infrastrutura at a orientare pro deghinas de annos sas polìticas e s’esistèntzia de fìgios, de nebodes e de chie no est ancora nàschidu.

Sas chimbe pregontas resument sos chimbe temas primàrgios chi pertocant sa metanizatzione de s’ìsula. Petzi una risposta crara e argumentada a totu sas pregontas nos at a permìtere, paris cun sas comunidades nostras, de pòdere seberare cun cabu. Continua a leggere ‘Sa Corona de Logu faghet chimbe pregontas a su guvernu de sa Regione Autònoma de Sardigna’

Binzamanna un’azienda sarda de primore

* Dae sa terra a sa butìllia * S’istòria de Binzamanna incumentzat a manera ufitziale in su 2001, candu Sara Spanu e Walter Deledda, cun s’iscopu de produire binos bonos e cun sa punna de torrare a impreare sas bìngias traditzionales de su territòriu de Màltis (biddighedda de sa regione istòrica de s’Anglona chi s’agatat a una deghina de chilòmitros dae Tàtari est a làcana cun sa Gaddura), fundant in pare sa cantina issoro.

Cun Binzamanna in Màltis sa bide est torrada a frorire. Inoghe, a pustis de su 1945, sas bìngias ant incumentzadu las lassare e posca fintzas a nde las bogare. Pro more de sa pèrdida de bides autòctonas, bides comente su Cagnulari e su Muristellu, sa cantina coperativa de sa bidda at tancadu sa produtzione de binu.

Sas bìngias de sa cantina Binzamanna sunt traballadas in unu terroir ricu de elementos minerales, cun presèntzia de calcare, importante meda pro sa produtzione de binos biancos saboridos e elegantes. A cantu amus naradu s’annanghet unu clima chi at ierros caldumos pro more de su mare e de sos rios. Continua a leggere ‘Binzamanna un’azienda sarda de primore’

Impitu militari de su portu de Casteddu: sa protesta de A Foras

14 de fiàrgiu – Est stètia presentata mèrculis 11 de su mesi de fiàrgiu s’interrogazione chi pertocat a sa transida de materiali de gherra de produtzioni RWM in is carreras de su comunu de Casteddu.
S’iscopu
est de cumprèndiri calisiat s’atentzioni chi tocat a ponni in su casu de intzidentis, calisiant is pianus de emèrgentzias programaus, ma fintzas cumprèndiri su pentzu de sa giunta comunali asuba de sa faina de sa fabrica de Domunòas.

In custa circustàntzia A Foras, movimentu contra s’ocupatzioni de sa Sardigna, at lamau unu pichetu a foras de su comunu po denuntziai su discùidu de is istitutzionis a faci de argumentus comenti sa seguresa, s’ambienti, su tràbicu in is carrelas e su movimentu de armas. Continua a leggere ‘Impitu militari de su portu de Casteddu: sa protesta de A Foras’

“Tenute Dettori”: una cantina sarda chi faghet binos ispantosos

* Dae sa terra a sa butìllia * Sunt binos naturales sena tzulfarosa, fermentàrgiu e madrighes. Semus faeddende de sas bevidas produidas de sas “Tenute Dettori” de Sènnaru, una bidda in provìntzia de Tàtari. Pro èssere precisos sos sarmentos s’agantant in localidade Badde Nigolosu.

Sa cantina Dettori est una realidade mastrina chi produit binos originales e territoriales in sos sartos de sa Romangia.

Lisandru Dettori, mere de s’azienda, rapresentat sa renàschida e sa revesa a foras de sas modas de sa bide e de su traballu in bìngia. Istimadore de Alex Podolinsky, mastru de sa biodinamica, Lisandru afirmat ca su binu est s’espressione prus pura e berdadera de sa terra. Continua a leggere ‘“Tenute Dettori”: una cantina sarda chi faghet binos ispantosos’