(IlMinuto) – Casteddu, 13 de su mes”e argiolas – Sa diri de su silenziu fissada po cras esti stetia annulada po mori de su rinviu de sa discussioni parlamentari chi tenìat po tema su ddl Alfano.
Archíviu de sa diri 13/07/2009
(IlMinuto) – Casteddu, 13 de su mes”e argiolas -
Casteddu, 11.00, riunioni de su Consillu comunali
Biddanòa, 25°anniversariu de sa Banda musicali
Casteddu, 20.30, Cineteca Sarda – viale Trieste 126, proiezioni de su film “Religious”
Orgòsolo, 22.00 prazza pubblica, concertu de is Casinò
S.Maria Navarrese, 22.00, diri de ballu lisciu e latinu
Lanusè, Bar Girilonga,atobiu informativu de A’ Manca pro s’Indipendentzia po chistionai de “Eiskal Erria: unu populu in gherra pro sa libertade”.
(IlMinuto) – Casteddu, 13 de su mes”e argiolas – IlMinuto at a partecipai cras, impari cun is aterus, a sa diri de s’assébiu de s’informazioni e de s’assébiu de is blog, cun s’obbiettivu de cuntrastai su ddl Alfano po is intercettazionis. S’apuntamentu cun is lettoris est po su mangianu de mèrcuris 15 de su mes”e argiolas.
(IlMinuto) – Casteddu, 13 de su mes”e argiolas – “Disarmanti, ironica e beffadora sa performance de sa danza futurista”. Aicci is organizzadoris definint “Fufffuturismo”, un’ispettaculu chi cun “danza, fueddus e tecnologia portat su pubblicu a castiai a su ‘movimentu’ de una prospettiva noa”. S’apuntamentu est po is 22.15 de mèrcuris in Casteddu, in su Teatru Civico de Castello.
(IlMinuto) – Casteddu, 13 de su mes”e argiolas – Is primus diris de austu s’at a tènniri unu controllu uguali in totus is 205 presonis italianus po disegnai unu cuadru cumpletu de is condizionis de vida aintru de is istitutus de pena. Ddu at nau sàbudu in d’una cuferénzia stampa in Casteddu sa Deputada radicali Rita Bernardini. Custa, impari a sa Segretaria nazionali Antonella Casu e a una rapresentanza de su Prc fut torrendi de fai ispezionis in is presonis de Casteddu e Macumère. “Cussa de Casteddu – at ispiegau Loddo de su Prc – est su presoni de su machiori, de sa droga e de sa maladia”. Unu contu cunfirmau de is nùmerus donaus de sa Segrataria Casu. “In Buoncammino – at ispiegau – ddoi funt 514 personas (po unu màssimu de 332 personas). 150 presoneris tenint maladias a conca e 220 funt drogaus”. Funt malas is cundizionis de vida puru in Macumère. “Unu presoni ‘po fai scramentai is presoneris’ e aundi est impedia dognia tipu de socialidadi”, at ispiegau Bernardini. “Is unicas respostas – at finiu su Segretariu federali de su Prc Stocchino – donadas de su stadu a su discómodu soziali funt is scontrórius e su presoni”.
(IlMinuto) – Casteddu, 13 de su mes”e argiolas – Beppe Grillo at scioberau sa Sardigna po cumenzai sa cursa a is primarias po s’elezioni de su Segretariu de su Pd. Custu mangianu su comicu liguri s’est fattu sa tessera de su Pd in Altzaghèna – èssiri iscritu est sa cundizioni po si podit candidai a sa segreteria -.
(IlMinuto) – Casteddu, 13 de su mes”e argiolas – Est Matteo Marini su bincidori de sa Coppa “Comune di Monserrato”, sa segundu tappa de su Giru ciclisticu de sa Provinzia de Casteddu. Ariseru a merì, a pustis de 25 girus de su “circuitu de is campionis” de via Caracalla, s’atleta de Pauli de sa Lex Bike Sardinia at precediu in s’ultimu sprint, a fini de sa gara, Mauro Vacca, Simone Vermi, Emilio Ciaccarelli e Enrico Picciau. Primu in sa classifica provvisoria de su Giru abarrat Vacca de su team Runner. Sa sfida s’at a rinnovai su 19 de su mes”e argiolas in Cabudèrra cun sa terza tappa de su torneu.
(IlMinuto) – Casteddu, 13 de su mes”e argiolas – “Su Presidenti Cappellacci est faendi biri ancora una borta, de no tenni a oi nesciuna autonomia politica e nesciuna autoridadi. Cun is “viàgius de s’isperanzia” in Roma fait biri de èssiri sempri prus “telecomandau” de Berlusconi. Ddu narat, in d’unu comunicau de imprenta chi chistionat de su isciòpiru generali de su 10 de su mes”e argiolas, sa Consillera regionali de is Rossomori Claudia Zuncheddu. “Sa Presidenti de su Consillu regionali Claudia Lombardo – ispiegat sa sardista de sinistra – iat fattu prus bella figura a convocai s’atóbiu estraordinariu de su Consillu prevìdiu po su 15 in su Petrolchímico de Pòrtu Turre, po èssi cun is operàjus, donendi aici unu signali forti de acozu a sa lota e un’istrónciu a s’Eni e a su Governu italianu. Is sadrus funt cumprendendi cun marigosori ca no si podit prus donai sa difesa de su cannizzu a is margianis.
(IlMinuto) – Casteddu, 13 de su mes”e argiolas – Est arribau de pagus cidas in is librerias su liburu “La bonifica di Arborea” (Iges). S’opera est curada de s’antropologa Gabriella Da Re – originaria de Arborea – e de se s’architettu Paolo Sanjust, cun fotografias de Marcello Stefanini.
“Maria Gabriella Da Re – si podit liggiri in d’una nota – at torrau a percùrriri is paesaggius bonificaus de sa piana de Terràba, aundi in is annus binti-trenta de su seculu passau est nàscia sa bidda. Funt presentis in su liburu puru testus istoricus e letterarius chi chistionant de sa bonifica”.
(IlMinuto) – Casteddu, 13 de su mes”e argiolas – Ddoi funt ancora pagus oras po podi participai a su bandu de sa “Camera di Commercio” de Aristanis chi premiat duas tesis de laurea chi chistionant de is “dinamiche e le prospettive di sviluppo della provincia”. Is dimandas de partecipazioni depint essi presentadas in sa Segreteria Generali de sa Camera in via Carducci 23-II. Is dimandas si podint consegnai finzas a is 13 de mèrcuris (mes”e argiolas). A su primu arribbau at a toccai unu premiu de 1600 eurus, a su segundu unu de 1200.
Social
