> 16 « mes’e argiolas « 2009 « ilMinuto – notizie Mediterranee – edizione Sardegna

Archíviu de sa diri 16/07/2009

Pàgina 2 de 2

Turismu: is tantis istadis de sa Marmilla

(IlMinuto) – Casteddu, 16 de su mes”e argiolas – Su cinema e sa musica blues, su teatru de istrada e is giogus tradizionalis de sa Sardigna. Est veramenti ricca de eventus s’istadi in is biddas chi ant donau vida a su programma “Marmilla, mille emozioni”. Su progettu esti stetiu presentau oi in Casteddu – in sa sedi de s’”Assessorato regionale del Lavoro” – de is responsabilis de s’”Agenzia di Sviluppo locale Due Giare”. Obbiettivu de s’iniziativa – at spiegau su cordinatori Diego Loi – est presentai in modu innovativu, risorsas e territoriu”. Funt úndixi is comunus de sa Marmilla chi promovint  “Mille emozioni”: Albajàra, Assòu, Asùni, Baradìle, Crucùris, Nureci, Pompu, Arruìnas, Senis, Simala e Bàini. Tra is iniziativas importantis po sa rassegna ddoi funt “La notte, il cinema, la luna”, s’”Asuni film Festival”, su festival “Mamma Blues” de Nureci e – in su mes”e ledaminis – is Olimpiadi de su giogu tradizionali de sa Sardigna, una manifestazioni chi coinvolgit is pipius de su Mediterraneu.

Marrùbiu: su Consillu comunali de is giòvanus chistionat de s’iscola

(IlMinuto) – Casteddu, 16 de su mes”e argiolas – Calis propostas presentai a chini de doveri abetendi s’annu iscolasticu chi at a benni? At essi custu unu de is puntus de discussioni de s’atóbiu de cras (18.00, àula consillari) de su Consillu comunali de is giòvanus marrubiesus: un’assembrea aundi is prus giòvanus imparant a cumprèndiri e a apressiai cantu est importanti sa participazioni ativa a sa vida de is istituzionis. Su síndigu pipiu – chi s’annu chi benit at a fai sa primu media – furiat stetiu elìgiu in su mes”e maju de is alunnus de sa 4° e 5° elementari e de totus is giòvanus de s’iscola de segundu e de primu gradu.

Vertenza chímica: Meloni (Pd), "Cappellacci depit dimandai iscusa po is mincidius e is promissas falsas"

(IlMinuto) – Casteddu, 16 de su mes”e argiolas – “Cappellacci depit pretèndiri de su própriu Presidenti de su Consillu una seridadi e unu riguardu prus mannus po is sadrus, depit pretèndiri chi si pighit is próprius responsabbilidadis pedendi perdonu a is citadinus sadrus po is mincidius e is promissas falsas fattas in campagna eletorali”. Aici su Consilleri regionali de su Pd, Marco Meloni, commentat is ùltimus isvulupus de sa crisi de s’industria chímica. “S’unidadi de is istituzionis, de is forzas politicas e de is partis socialis – precisat s’esponenti de su Pd – no podit sutràiri Cappellacci e sa magiorànzia de centrudestra a sa responsabbilidadi de ottèniri de su Guvernu nazionali resultaus cuncretus e subitanus: cumenzendi cun s’annullamentu de sa decisioni de s’Eni de serrai is impiantus de Pòrtu Turre.

Primu diri "Antisuperstizione": Cicap, apuntamentu in su circulu Houdini de Cuartu Sant’Alèni a is 17.17 de cenàbara 17 de su mes”e argiolas

(IlMinuto) – Casteddu, 16 de su mes”e argiolas – Passai asuta de una scala, segai unu sprigu, obèrriri unu paraqua in d’unu logu serrau. Funt scéti calincuna de is medas tapas chi fait su Cicap (Comitato di controllo delle affermazioni sul paranormale) sadru po sa primu diri “Antisuperstizione”. Su comitau donat apuntamentu a is temerarius e a is curiosus in Cuartu Sant’Alèni, in is localis de su circulu Harry Houdini de via De Gasperi 48 a is 17.17 de cenàbara 17 de su mes”e argiolas. “A cussus prus coraggiosus, chi ant a finiri su percursu – spiegant is organizzadoris – at essi donau un’attestau Oficiali de Antisuperstizioso’”. At a fai su doveri de domu s’illusionista Alfredo Barrago. Dd’at essi puru s’attori Tino Petilli, chi at a chistionai de sa superstizioni in su mundu de s’ispettaculu, contendi leggendas, curiosidadis e manias de dognia tipu.

Apuntamentus de oi

(IlMinuto) – Casteddu, 16 de su mes”e argiolas -

Santu Sperau, 16-19 de su mes’e argiolas, Sagra de su pressiu

Teulada, festeggiamentus po sa Madonna de su Cramu

Ittiri, “Ittiri Folk Festa 2009″: Festival internazionali de danza e espressionis popolaris

Alighera, “Lungomare Barcellona”,”In Alghero Folk International”

Marrùbiu, 18.00, Aula de su Consillu, Consillu comunali de is jòvanus

Casteddu, 21.00, Anfiteatru romano, Pfm candat De Andrè

Orgòsolo, 21.00, prazza pubblica Casinò in concertu

Palau, 21.30, Fortezza Monte Altura, Baires Tango

Sarròccu, 21.30, villa Siotto “Tenebras” de e cun Elio Turno Arthemalle, Dorian Gray, Cristiano Bandini, Paolo Carboni

Casteddu, 22.00, Corto Maltese, The Toasters in concertu