> 29 « mes’e argiolas « 2009 « ilMinuto – notizie Mediterranee – edizione Sardegna

Archíviu de sa diri 29/07/2009

Pàgina 2 de 2

Crisi de sa domu: in centu contra a is sfratus de s’Area

(IlMinuto) – Casteddu, 29 de su mes”e argiolas – “Area: s’unica agenzia immobiliari chi no t’agiudat a agatai domu, ma chi t’agiudat a da perdi”. Custu su slogan de unu cartelloni apicau in su muru de sa Regioni de is manifestantis de su presidiu contra a is isfrattus in Casteddu e in Nùgoro boffiu de su sindacau Rdb Cub. A facc”e sa sedi de su Consillu regionali, in via Roma, si funt presentaus cussus chi ant tentu su sfrattu, is militantis de s’ Rdb e de su Prc, de Sinistra Critica, de su Collettivu marxista-leninista de Nùgoro e de A Manca pro s’Indipendentzia. Una delegazioni de is centu manifestantis at a biri is capugruppus in Consillu. “Is sfrattus annunziaus de s’Area (ex Iacp) – ispiegat Enrico Rubiu de s’Rdb – funt 200 in Casteddu, 60 in Tàtari e 50 in Nùgoro. A custus andant aciuntus is 400 sfrattus de is privaus”. “Is affittus – sustènit Rubiu – funt troppu carus. De candu teneus s’euru is sfrattus funt aumentaus de su 130 po centu”.

Turismu: arribat a sa 25a edizioni sa Sagra de sa varnaccia de Boàtiri

(IlMinuto) – Casteddu, 29 de su mes”e argiolas – “Sapori divini”: est cussu su titulu de sa binticinquesima edizioni de sa Sagra de sa varnaccia chi cumenzat oi in Boàtiri. Ocannu s’amministrazioni comunali, in collaborazioni cun s’Agenzia Regionali Laore, at a accumpangiai is ospitis in d’unu percursu guidau tra varnaccia e cos”e papai de su logu. Cumenzendi de oi a is 19.00 – finzas a su 31 – citadinus e turistas ant a podi buffai is binus prus bellus de Boàtiri, accumpangiaus de is pietanzas tipicas de su logu. Is assaggius ant essi precedius de is interventus fattus de genti pratica in materia. Custumerì at essi affrontau su tema “La vernaccia e il suo territorio”.

Sciusciant is villas de Badas: Zuncheddu, "Po su síndigu Floris su profitu est prus importanti de su géniu".

(IlMinuto) – Casteddu, 29 de su mes”e argiolas – “Po su síndigu Floris e po sa Giunta comunali un’atera borta su profitu est prus importanti de su géniu riconotu de cussus ‘e totu “. Aici sa Consillera comunali de Casteddu de is Rossomori, Claudia Zuncheddu, cummentat su sciúsciu de is istoricas villas progetadas de s’architetu Ubaldo Badas. “A Badas – ispiegat Zuncheddu – maistu de òperas de valori chi ant donau richesa e bellesa a sa cittadi de Casteddu, s’amministrazioni comunali at dedicau un’istrada. Po arregodai is òperas de Badas is Facoltadis de Ingegneria e Architetura faint cunvegnus internazionalis. In su mentris s’amministrazioni comunali de centrudestra permitit chi si sciuscint in pagu tempus is òperas de un’artista, sburrendi sa memoria architetonica de sa cittadi e neghendi a is inzénnerus nous sa possibbilidadi de gosai de custas òperas”.

Ciclismu: Vacca bincit su Giru de sa provinzia de Casteddu


(IlMinuto) – Casteddu, 29 de su mes”e argiolas – Est Mauro Vacca su bincidori de su Giru ciclisticu de sa Provinzia de Casteddu. Su fuoriclasse de Casteddu de sa Runner est arribau primu in classifica a pustis de sa cuarta e ultima tappa de su Giru: sa coppa “città di Mandas”. Trofeu bintu de Giovanni Langiu de sa Extreme de Casteddu, arribau a su traguardu po primu cun d’unu minutu e mesu de distacu rispetu a Federico Lecca de sa Mtb de Sìnnia. Su terzu classificau esti stetiu su campioni de totu su Giru de sa provinzia, Vacca.

Apuntamentus de oi

(IlMinuto) – Casteddu, 29 de su mes’e argiolas –
 
Boàtiri, 29-31 de su mes”e argiolas, Sagra de sa varnaccia

Biddanòa, Ceas Monte Minerva, “Lanterne nel bosco”: po si sciri orientai e po scoberriri su territoriu

Casteddu, 9.30, Lazzaretto, assemblea pubblica po chistionai de isviluppu e traballu

Casteddu, 10.30, via Roma a facc’e de su Consillu regionali, manifestazione indetta de Rdb Cub p0 su dirittu a sa domu

Crabònia, 19.00, “La Gabbianella fortunata”: atobiu cun Gennaro Migliore

Cuartuciu, 21.00, Casa Angioni, Balletto di Sardegna

Pauli, 21.00, giardinettus de via del Redentore, “Prestami una vita” – jam session

Iscanu, 21.00, prazza San Nicolò, celebrazioni de is 80 annud de s’Azione cattolica scanese

Casteddu, 22.00, prazza Savoia, “Brasibalanco”: unu viaggiu tra is sonoridadis de su samba-jazz

Roma, 22.00, Villa Ada, concertu de Elena Ledda Sestetto

Palau, 22.15, Fortezza Monte Altura, “Il giorno del giudizio”: reading de su romanzu de Sebastiano Satta