> Biddexidru: is animalistas blocant sa "deportazioni" de dexi canis vagabundus a su canili de Terranòa « ilMinuto – notizie Mediterranee – edizione Sardegna

Biddexidru: is animalistas blocant sa "deportazioni" de dexi canis vagabundus a su canili de Terranòa

(IlMinuto) – Casteddu, 6 de su mes”e austu – Is animalistas ant bintu. Centinaia de telefonadas a is giornalis sadrus e nazionalis e s’annùnziu de unu scioperu de su famini de parti de is attivistas ant fattu torrai a coa su furgoni chi, ariseru a mangianu, trasportàt 10 canis vagabundus pigaus de su canili comunali de Biddexidru po ddu su portai in su canili de Terranòa. Trasportu fattu po mori de una convenzioni tra su comunu de su Mediu Campidanu e su canili Europa de sa cittadi galluresa. Immoi is vagabundus ant essi totus adotaus de is attivistas. Sa mobilitazioni at blocau cussa chi is animalistas zerriant “deportazioni unitili e senz”e sensu de creaturas chi non podint conòsciri su propriu destinu, chi non podint sciri de essi unu strumentu in is manus de genti chi dezidit de sa sorti insoru andendi contra a sa lei 381 de su 1991, chi chistionat de su benessiri de is animalis”. Nonostanti su successu de sa mobilitazioni de ariseru, sa chistioni abarrat. Difatis, in basi a sa convenzioni tra su canili e su comunu, totus is canis vagabundus catturaus ant essi trasportaus in su canili de Terranòa finzas a candu “amministratoris responsabilis e de bonu coru non ant a dezìdiri de fai finiri custa fastidiosa vicenda”.

© RIPRODUZIONE RISERVATA

0 Arrespustas a “Biddexidru: is animalistas blocant sa "deportazioni" de dexi canis vagabundus a su canili de Terranòa”


Is cummentus funt serraus.