> 2009 mes’e cabudanni | ilMinuto

Archìviu de mes'e cabudanni 2009

Apuntamentus de cras 1 de su mes”e ledaminis

(IlMinuto) – Casteddu, 30 de su mes”e cabudanni -

 

 

 

Casteddu, finzas a su 3 de su mes”e ledaminis, parcheggius de Monte Claro, “Festa comunista per l’Unità”

 

 

Casteddu, 1-4 de su mes”e ledaminis, Teatro T.Off, II rassegna Danzainmovimento

 

 

Bologna, 21.00, Arteria, concertu de su duo sardo Bentesoi

 

 

Casteddu, 21.00, Cineteatru Nanni Loy, rassegna cinematrografica “Uno sguardo normale”

 

 

Tàtari, 21.00, Sala Sasso de su Conservatoriu, Massimo Carlotto presentat “L’amore del bandito”

 

 

Casteddu, 21.00, Ghetto degli ebrei, “Festival le Salon de Musique”: concertu de sa pianista armena Diana Gabrielyan

Finanziaria: Diana (Pd), is intradas prus mannas funt frutu de sa vertenza cun su Stadu

(IlMinuto) – Casteddu, 30 de su mes”e cabudanni – “Arriciu cun pràxeri s’arreconnoscimentu chi su presidenti Cappellacci at fattu narendi ca is intradas prus mannas, a regimi de su 2010, funt frutu de sa vertenza cun su Stadu chi s’est concludia cun suzzessu in sa legisladura passada”. Ddu narat cun d’unu comunicau stampa a sa segreteria regionali de su Partito Democratico Giampaolo Diana. “Immoi ca teneus prus risorsas – precisat Diana – iat a essi giustu chi su presidenti de sa Giunta no iat a fai diventai inútili su cuadru nou de is intradas, sighendi a fai serbidori de is furas de su Guvernu Berlusconi”.

In Casteddu cumenzat sa "Festa comunista per l’Unità". Sabudu arribbat Ferrero

(IlMinuto) – Casteddu, 30 de su mes”e cabudanni – Cumenzat custumerì in is parcheggius de Monteclaro in Casteddu sa “Festa comunista per l’Unità” aprontada de is círculus de su Prc e de su PdCi de sa cittadi. S’apuntamentu est de oi finzas a su 3 de su mes”e ledaminis. Un’apuntamentu arricu de stand culturalis e gastronomicus, chi previdit unu calendàriu meda densu aundi ddoi ant essi dibbatidus, concertus e proiezionis cinematograficas. Previdia, po sa serada de sàbudu, sa participazioni de su segretariu nazionali de su Prc Paolo Ferrero in s’assembrea chi tenit comenti tema “Un programma per la sinistra”.

Castia su programma a s’indirizzu: www.festacomunista.org

Vigilis de su Fogu de s’Rdb Cub: "No pedeus medàglias, ma stipendius e seguresa in su traballu". Litera a Napolitano

(IlMinuto) – Casteddu, 30 de su mes”e cabudanni – Unu Cuntrattu nazionali scadiu de casi duus annus, mezzus bèccius e mancantis. Turnus massacrantis e un’orgànicu redùxiu a s’ossu. Est custa sa situazioni ca is Vigilis de su Fogu de s’Rdb-Cub ant dinunziau cun d’una litera a su presidenti de sa Repubblica, Giorgio Napolitano. Custu mangianu sa litera esti stetia consignada a is prefettus de numerosas cittadis italianas. Casteddu cumpresa. Is Vigilis de su Fogu de su sindacau de basi no funt xirchendi riconoscimentus in pompa magna: po custu ant refudau de andai a sa festa de su Corpu nazionali – chi s’est tenta custu mangianu a su Quirinali – cun sa consigna de sa Medaglia de oru a sa Bandera. 30 pompieris de Casteddu, Nùgoro, Aristanis e Igrèsias ant spiegau is motivus de su própriu refudu a sa stampa in d’unu sit in de protesta in prazza Palazzo, a facc”e sa sedi de sa Prefettura. “No pedeus medàglias – at spiegau Gianfranco Mei de Igrèsias – pedeus medas cosas ca immoi no teneus: s’adeguamentu de su stipendiu e su rinnovu de su parcu po is mezzus, po fait un’esempiu. Pensai ca is straordinarius si benint pagaus cun d’un’annu de ritardu”. Is Vigilis de su Fogu arriscant sa vida po 1300 eurus, sa paga media a pustis de 15-20 annus de serbiziu. “A dexi pensionamentus currispondit scéti unu postu de traballu – at precisau su Cordinadori regionali de sa Rdb VVf Enrico Carboni – e is organicus funt sempri prus sbuidus. Candu ddoi funt accidentis is turnus raddoppiant: seus costrìngius a s’agollai is nostras oras de reposu e a traballai in condizionis de stanchesa pesanti”. Sa dinunzia mandada a Napolitano est meda clara. “Mentris su Stadu italianu si premiat po is nostras azionis e esaltat su ruolu de su Corpu nazionali -precisat su testu – su Guvernu sighit a si ndi liai dinai”. “Contrariamenti a is proclamas – dinunziat sa litera a su capu de su Stadu – in Italia no si bogat dinai po sa seguresa: si preferit donai su dinai a is milla organizzazionis de protezioni civili e de volontariaus útilis po sa comunidadi, si funt de agiudu a unu Corpu nazionali Vvf fattu po rispondiri (…) in modu capillari a is bisòngius de totu su territoriu”.

Sa Cgil bullat sa Finanziaria de sa Giunta: "No fait nudda po cumbatti contra a sa crisi"

(IlMinuto) – Casteddu, 30 de su mes”e cabudanni – “In sa Finanziaria no ddoi funt misuras po cumbatti contra a sa crisi”. Est custu su giudiziu donau de sa Cgil po sa manovra presentada de sa Giunta regionali. Su sindacau torrat a arremacciai cantu esti stetiu pediu prus de una borta a s’assessori Giorgio La Spisa, est a nai sa nezzessidadi de donai prus attenzioni e prus risorsas a su traballu e a su sviluppu. Manna sa critica po su creditu de imposta. “Esti nezzessariu cuncentrai is risorsas po is impresas chi donant incarrigus de traballu -  precisat su segretariu de sa Cgil Enzo Costa – e no po is impresas chi si limitant a no fai lissenziamentus, comenti at precisau custu mangianu s’assessori La Spisa”. Su tema esti stetiu afrontau in totus is atóbius tra assessoris e sindacaus: “Eus pensau – ispiegat Costa – ca iat a podi essi arricida sa dimanda chi eus fattu poita in custu momentu de crisi si parrit normali premiai is impresas chi donant traballu”. Po sa Cgil “distribuiri su dinai comenti s’àcua a totus is impresas chi non lissenziant non est po nudda utili poita no creat nesciunu postu de traballu in prus”.