> 2009 mes’e ledàminis 05 | ilMinuto

Archíviu de sa diri 5/10/2009

Apuntamentus de cras 6 de su mes”e ledaminis

(IlMinuto) – Casteddu, 5 de su mes”e ledaminis -

 

 

 

Serrenti, ultima giornada de sa Festa de Santa Vitalia

 

 

Casteddu, 10.30, istazioni ferroviaria, Manifestazioni pubblica contra su campu eolicu de Is arenas

 

 

Casteddu, 18.00, via Roma a facc”e su Consillu regionali, manifestazioni contra su “Piano-casa”

 

 

Casteddu, 21.00, Ghetto, concertu de su chitarrista Simone Schirru

 

 

Azos, 22.00, prazza pubblica, concertu de Maria Giovanna Cherchi

 

Casteddu, unu portali de sa "Camera di Commercio" po is impresas chi traballant cun s’esteru

(IlMinuto) – Casteddu, 5 de su mes”e ledaminis – Promòviri is impresas meridionalis de sa Sardigna chi traballant in is mercaus esterus e presentai sa própiu economia a is investidoris strangius. Est custu s’obbiettivu de su portali www.sardiniaexport.it presentau in is diris passadas de su “Centro servizi per le Imprese” de sa “Camera di Commercio” de Casteddu. “Su progetu – si podit ligi in d’una nota – est po totus is impresas iscritas in sa “Camera di Commercio” de Casteddu chi possant dimostrai una presenzia fissa e de fill’e pari in is mercaus internazionalis”.

Caminai po pediri sa solidariedadi, is diritus e su traballu. Domìnigu s’ottava "Marcia per la Pace Gesturi-Laconi"

(IlMinuto) – Casteddu, 5 de su mes”e ledaminis – Diritus, giustìzia soziali e traballu. Funt custus is fueddus chi animant s’ottava edizioni de sa “Marcia per la Pace Gesturi-Laconi”, in programma po domìnigu chi benit. Sa manifestazioni – boffia de sa “Tavola sarda della Pace” – esti stetia presentada custu mangianu in sa sala stampa de su Consillu regionali. “Chini partecipat a sa Marcia – at nau su portavoci de sa “Tavola della Pace” don Ettore Cannavera – est prus acanta a su messaggiu de su cristianesimu de chini andat scéti a missa e fait sa comunioni. Deu iat a bolli chi sa genti fessat prus consienti – at precisau – e chi essat a refudau s’ordini costituiu”. Sa marcia de su 2009 est in su mesu de sa crisi economica e po custu is temas de su traballu e de sa solidariedadi soziali ant fattu de guida a sa confèrenzia stampa. “Eus boffiu pòniri s’accentu – at nau Marinora Di Biase de sa Cgil – a temas comenti cussu de su diritu a su traballu, de sa solidariedadi soziali e de s’occupazioni, poita senz’e traballu no ddoi est paxi e no ddoi est solidariedadi”. “No ddoi est paxi senza giustizia soziali – at nau Mariella Cao de su ‘Comitato Gettiamo le Basi’ – Aici comenti no dd’at essi paxi finzas chi dd’ant essi custas basis de gherra, chi si cundennant, poita seus vittimas e complizis de totus is gherras chi ddoi funt in su mundu”. “S’isola nostra – at nau Giacomo Meloni de sa ‘Confederazione sindacale sarda’ – depit ammostai unu signu: de essi una terra de paxi chi aghillit. Su traballu depit essi traballu po totus, puru po is immigraus”. A custu propositu, at arregordau Franco Uda de s’Arci, su 17 de su mes”e ledaminis ddoi at essi una manifestazioni antirazzista in Casteddu. S’apuntamentu cun sa “Marcia della Pace” est a is 9.30, a facc”e sa crèsia de Gesturi. A is 11.00, in sa saba de is atóbius de sa bidda, est previdiu unu dibatidu cun sa partecipazioni de Ottavio Olita (Articolo 21), de Enzo Costa (Cgil), de Mariella Cao e de una rappresentanti de su Coordinamentu de is precarius de s’iscola de Aristanis.

Allagamentus: Espa (Pd), "Cabudèrra a arriscu comenti Messina. Est nezzessariu chistionai cantu primu de su progetu po pòniri in seguresa su territoriu"

(IlMinuto) – Casteddu, 5 de su mes”e ledaminis – “Su tragicu allagamentu de Messina si fait cumprèndiri comenti su tempus malu possat torrai a fait damnus in pagu tempus”. Su Guvernu no si depit scaresci de s’allagamentu de su 2008 in Sardigna, finzas a oi at donau scéti 6 millionis de eurus. Nudda po sa seguresa de su territoriu”. Ddu dinunziat cun d’unu comunicau stampa su consilleri regionali de su Pd Marco Espa. “In Cabudèrra – precisat Espa – seus a arriscu comenti in Messina. 10 milla personas funt a arriscu in s’arriu de San Girolamo e podint essi colpias inderetura”. “Cabudèrra tenit bisóngiu de discútiri sa lei “Salva Case” po salvai is domus de chini tenit domu própria, e sa vida de 10 milla animas chi ddoi bivint, e chi timint nous allagamentus”. “Est urgenti – insistit s’esponenti democratico – esaminai su progetu de lei chi eus propostu, cussu de sa seguresa definitiva de su territoriu, no cussu de is contributus. Sa genti timit, scit ca no ddoi est dinai po ponni totu in seguresa . S’unicu istrumentu est s’immediatu dibbatimentu de su progetu chi previdit finanziamentus po 40 millionis de eurus”.

Ferrero serrat sa "Festa comunista" in Casteddu. Regionalis 2010: "acórdius bonus aundi at essi possíbbili"

(IlMinuto) – Casteddu, 5 de su mes”e ledaminis – “Sa sinistra depit essi capaci de torrai a costruiri sa própriu onori”. S’inserrat forsis in custus pagus fueddus su sensu de s’interventu de su segretariu nazionali de Rifondazione comunista, Paolo Ferrero, a s’assembrea chi, sàbudu a merì, at serrau is cuatru diris de sa “Festa comunista per l’Unità”, chi s’est tenta in is parcheggius de su Parcu de Monte Claro, in Casteddu, de su 30 de su mes”e cabudanni a su 3 de su mes”e ledaminis. Sa rezzeta presentada de Ferrero po costruiri una sinistra apressiada est sa “Federazione”, unu patu chi “siat in gradu de tèniri aintru totus cussus partidus chi podint agiudai a fai unu progetu de cambiamentu soziali. Po su segretariu, sa “Federazione” depit biri s’acórdiu cun ateras forzas politicas, no depit essi scéti tra Prc e PdCi, depit essi capaci de superai is “otu sparziduras” chi ant fattu s’istoria de Rinfondazione. Ferrero at fueddau puru ideas chi tenit po su Guvernu de s’Italia: unu pianu po sa seguresa de su territoriu, s’afotiamentu de s’interventu pubblicu in s’economia e in su stadu soziali. Po is regionalis de su 2010 su leader de Rifondazione est propensu a fai coalizionis cun su centrusinistra “atressu acórdius bonus aundi at essi possíbbili”. S’assembrea esti stetia introdùsia de is segretarius regionalis de su Prc, Gianni Fresu, e de su Pdci, Claudio Giorgi, de acórdiu po torrai a uniri in pagu tempus is duus partidus comunistas.