> 06 « mes’e arbili « 2010 « ilMinuto – notizie Mediterranee – edizione Sardegna

Archíviu de sa diri 6/04/2010

Pàgina 2 de 2

Nedo Fiano in Tissi po contai Auschwitz. "Testimóngiu de s”Olocausto’ po totu sa vida"

(IlMinuto) – Casteddu, 6 de su mes”e arbili – S’òpera de testimónia de Nedo Fiano, númeru A5405 in su campu de Auschwitz, sighit. S’iscritori, nàsciu in su 1925 in Firenzi, cenàbara at essi in Tissi (18.00, Exmà) po contai s’esperiénzia de cuss”e totu e tenni bia sa memória de s”Olocausto’ nazista: su progetu de strossa de ses millionis de ebreus.
Po s’atóbiu ant a participai su síndigu de Tissi, Maria Luisa Cocco, e Aldo Borghesi de s’Issra. “Cun mimi in Auschwitz – ispiegat Fiano (fonti www.massamarittima.info) – ddoi furiat totu sa família mia, funt stetius bocius totus. A 18 annus seu abarrau òrfanu e cust’esperiénzia meda mala m’at fattu diventai un’ómini diversu, unu testimóngiu po totu sa vida”.

 

Caligaris (Sdr): "In Buoncammino presoneri chi no podit abbarrai in presoni"

 

(IlMinuto) – Casteddu, 6 de su mes”e arbili – “At passau puru sa diri de Pascamànna in presoni si puru is perízias, puru cussa de su Tribbunàli, ant declarau ca su presoneri no ddoi podit abbarrai. Roberto Vinci, 38 annus, est presoneri de 150 diris”. Est cantu denunciat cun d’una nota Maria Grazia Caligaris, presidenti de s’assoziazioni “Socialismo Diritti e Riforme”.
“S’ómini – acrarat s’esponenti socialista – chi tenit un’esaurimentu meda malu, acumpangiau de s’istintu de si bociri, est in presoni in su “Centro diagnostico terapeutico” de Buoncammino, aundi est tentu a castiu sempiri cun d’una “telecamera”. Is cundizionis de saludi funt aggravendusì de diri in diri e funt sempiri prus difícilis de afrontai. Est apretosa un’atera pena chi no siat su presoni. Abetendi s’iscera de sa “Comuninadi” at essi mellus a ddi donai is arrestus in domu o in d’un’ateru logu chi no siat unu presoni”. 

 

Elezionis. Sel narat sì a is primarias. "Su centrusinistra no tenit is ennas arrumbulanas"

(IlMinuto) – Casteddu, 6 de su mes”e arbili – “S’alleànzia no tenit is ennas arrumbulanas. Tocat a dd’accabai cun is ànsias de sa política bécia. Chi bollit participai a costruiri sa proposta de guvernu de su centrusinistra ddu depit declarai”. Est cantu afirmant cun d’una nota is consilleris de Sinistra Ecologia e Libertà Carlo Sechi e Luciano Uras, abetendi is elezionis amministrativas de su 30 e de su 31 de su mes”e maju.
Sel si ndi stresiat de su comunicau contra a is primarias firmau de su Prc, de su Pdci e de su Psi.
“Si ddoi funt chistionis po is candidaus – scrint Sechi e Uras – si fazant propostas diversas e, si is grupus dirigentis no arrennescint a istrobillai is chistionis, tocat a fai fueddai a s’eletorau.
Is primarias – acrarant – funt una pràtiga sperimentada in logus de clara e libbera participazioni democratica, comenti is Stadus Unius”.

Santa Lucia: su Puc nou scancellat s’albergu ma no salvat su pinedu. Marrania tra Comitau e Legambiente

(IlMinuto) – Casteddu, 6 de su mes”e arbili – Vitória “pagu bella” po su “Comitato Salviamo Santa Lucia”. Su consillu comunali de Thiniscòle riuniu in su noti tra su 26 e su 27 de su mes”e marzu at difatis scancellau de su Pianu urbanisticu comunali s’istrutura albeghiera chi iat a essi depia nasci in su pinedu de Santa Lucia.
Unu cambiamentu si castiaus a sa varsioni passada de su Puc, chi perou no parrit garentiri sa salvaguàrdia de s’intera area: “Su pinedu chi ingiriat su burgu – scririt Antonella Tocco in su situ de su Comitau – at a benni abbatiu po fai logu a un’istrada noa (…) e a areas destinadas a parchegius”.
“Is annotus presentaus de 21 citadinus a nòmini de su Comitato Salviamo Santa Lucia – acrarant is aprontadoris de sa cosa in d’una nota – ant arriciu no totu s’acatu dimandau biu ca s’istrutura alberghiera (…), chi s’agatat in continuidadi cun sa bidda de is Piscadoris, esti stetia scancellada de su Pianu. No s’est tratau de unu scioberu políticu, ma de una decisioni chi est tocau a pigai, de su momentu ca is 16milla mq previdius po sa cosa, a pustis de is regalias distribbuias lùnis, iant a depi costituiri una bundànzia de su ballúmini”.
Sa vitória “zopa” no consolat su Comitau chi “biendi su Puc comenti una mera cosa de azionis specíficas, (…) adotau senz”e onestadi, si pigat s’impignu de s’opòniri a is scioberus de pianificazioni fattus senz”e tenni ni modu ni manera”.
Dda penzat in d’un’ateru modu Legambiente, chi aghillit in veci cun grandu cuntentu su Puc nou. “Importanti e positiva sa decisioni de su Consillu comunali de Thiniscòle – cummentat s’associazioni ambientalista in d’unu comunicau de imprenta – chi in sa ‘rimodulazione’ de su Puc at scancellau sa previsioni de su progetu albeghieru”.
“Su scioberu de sa Giunta e de su Consillu comunali de Thiniscòle – narat su senadori Francesco Ferrante de sa segreteria nazionali de Legambiente – est unu scioberu coragiosu e fillu de una retórica positiva”.

www.salviamosantalucia.org
www.legambientesardegna.com

Sighi a ligi ‘Santa Lucia: su Puc nou scancellat s’albergu ma no salvat su pinedu. Marrania tra Comitau e Legambiente’

S’Alighera "città sostenibile": sàbudu assembrea po chistionai de su futuru urbanisticu de su centru catalanu

(IlMinuto) – Casteddu, 6 de su mes”e arbili – Progetai S’Alighera de su futuru: una citadi atenta a s’arrespetu po s’ambienti, a is consumus de s’energia e a sa salvaguàrdia de su própriu patrimoniu artisticu e culturali. Est custu s’obbietivu de s’assembrea “Costruire la città sostenibile”  aprontada po sàbudu chi benit (9.30, Cavall Marì) de “Legambiente Alghero” e de su Cna.
Po s’atóbiu – bófiu comenti “momentu participativu” abetendi s’aprou de su Puc – ant a chistionai is citadinus, is impresas, is amministradoris, is maistus de s’Uniniversidadi e is ambientalistas.
“Sa citadi de S’Alighera – si podit ligiri in d’una nota – si podit immaginai. Tocat a ponni impari sa bellesa, sa calidadi de sa citadi istorica, is ispetaculus ispantosus de sa natura cun su cambiamentu tennologicu (…), est a nai ca tocat a ponni impari totus is ingredientis principalis de sa nozioni nostra de benèsseri”.