> mes’e maju « 2010 « ilMinuto – notizie Mediterranee – edizione Sardegna

Archìviu de mes'e maju 2010

Pàgina 2 de 44

Elezionis in Tàtari. Cristiano Sabino (A Manca): "Negau su diritu de votu a su candidau a síndhigu Bruno Bellomonte"

(IlMinuto) – Casteddu, 31 de su mes”e maju – Su candidau a síndhigu de Tàtari de A Manca pro s’Indipendentzia, Bruno Bellomonte, no at a podi votai. “Eus scipiu – denunciat s’imbasciadori de aMpI Cristiano Sabino – ca su Dap at impunnau sa decisioni de su giugi de trasferiri Bruno Bellomonte in su presoni de San Sebastiano forsis po ‘chistionis de seguresa’ e custu bollit nai ca a Bruno esti stetiu negau su diritu de votu”: Bellomonte no at a podi infilai s’ischeda in s’urna eletorali, ma sa solidariedadi ingíriu a su dirigenti de sa sinistra indipendentista sighit a aumentai.
Ariseru a mangianu pagu prus de 100 personas ant participau a su presidiu de solidariedadi aprontau de aMpI asuta de su presoni tataresu. Crescint de diri in diri is adduimentus a s’apellu de solidariedadi – promòviu de “‘Il minatore rosso’ – contra a su lissenziamentu de Bellomonte de Rfi. De ariseru sa firma de su ferrovieri Dante De Angelis, responsàbbili de sa seguresa lissenziau duus annus fait de Trenitalia.
A Bruno – precisat Sabino – funti stetius liaus totus is diritus civilis e políticus: esti stetiu cunfinau po un’annu in Sianu-Catanzaru contra a is leis italianas ‘e totu, is leis de sa territorialidadi de sa pena; dd’esti stetiu impidiu de participai a sa campagna eletorali, no at poziu participai nemmancu cun d’una simpli registrazioni po acrarai is arrexonis de sa própriu candidadura; esti stetiu impidiu a is imbasciadoris de sa própriu lista de participai a is tribbunas políticas cun is candidaus de is partidus italianus, (in totali ausenzia de par condicio), e immoi dd’esti stetiu liau puru su diritu de votu!”.
“Pigaus atu – acrarat s’imbasciadori de aMpI – de custas mancànzias de parti de su Stadu italianu e de totus is rapresentantis suus, a cumenzai de cussus de su territoriu, comenti su síndhigu e su prefetu, chi no ant fattu nudda po garentiri a unu citadinu insoru is prus elementaris diritus civilis e políticus”.
“Is elezionis comunalis chi si funt tenendi immoi – concluit Sabino – pigant una trassa po nudda democràtica, biu ca unu de is tres candidaus a síndhigu no at poziu pediri su votu a is citadinus tataresus e no at poziu nemmancu participai a sa gara eletorali comenti furiat in is próprius diritus”.
Is primus centu firmas de sa genti chi at acozau s’apellu contra a su lissenziamentu de Bruno Bellomonte:
http://ilminatorerosso.blogspot.com/2010/05/elenco-primi-cento-firmatari-contro-il_29.html

Karate: cunfirma po is atletas de Alberto Piludu a is campionaus italianus de Giussanu

(IlMinuto) – Casteddu, 31 de su mes”e maju – Un’oru, tres pratas e unu brunzu. A sa torrada de is campionaus nazionalis Shotoreigikan-Feikar de Giussanu, est in ativu su bilànciu de sa scuadra de su Karate Club Kanazawa de Cuartu Sant’Alèni. Su 23 de su mes”e maju is atletas allenaus de is maistus Alberto Piludu (VII dan) e Alberto Fogu (VI dan) ant cunfirmau sa própriu classi in duas abbilidadis cussa de su kumite (cumbatiméntu) e cussa de su Kata (formas ‘preordinate’).
Su giovanuddu Alessandro Piludu at concuistau s’oru in su Kata (14-17 annus). Dópiu prata po s’agonista brasialiana Rosmari Machado da Silva, chi at otentu su segundu postu in su Kata e puru in su Kumite (24 annus e prus). In su zugu s’est bia una medàllia de prata puru po Luca Matta (cumbatiméntu, 18-24 annus).
De signalai puru su cuartu postu de Nicola Moi in su kata (18-24 annus) e sa gara bella de Matteo Veroni, cintura marroni, terzu in su kumite po sa categoria 18-24 annus.

Elezioni provinzialis. Renúnzia record a su votu. Sa frecuénzia de sa genti chi est andada a votai est de su 37,47 po centu a is 22.00 de ariseru

(IlMinuto) – Casteddu, 31 de su mes”e maju – Su “partidu de sa renúnzia a su votu” sighit a guadangiai cunsensus. A is 22.00 de ariseru scéti su 37,47 po centu de is sadrus furiat andau a votai po is elezionis provinzialis, cun d’unu crollu de sa frecuénzia de s’11 po centu.
Record negativu po sa Provìnzia de Casteddu, aundi scéti su 30,08 po centu de is eletoris at votau (-13 po centu si cunfrontau a is elezionis provizialis passadas).
Prus arta in veci – 49.23 po centu – sa frecuénzia po is comunalis, cun d’unu calu de su seti po centu.
Is ségius ant abarrai obertus finzas a 15.00 de oi.

Apuntamentus: Santu Lussurzu sa 104a edizioni de "Cavallinfiera"

(IlMinuto) – Casteddu, 31 de su mes”e maju – “Sa prus antiga e importanti manifestazioni fieristica de sa Sardigna”. Aici is aprontadoris definint “Cavallinfiera”, apuntamentu arribbau a sa 104a edizioni e in programma cras e mérculis in Santu Lussurzu, in localidadi San Leonardo de Siete Fuentes.
Po un’area de tres etarus ant essi presentaus 250 cuaddus de raza “Anglo Arabo Sardo”, “Sella Italiano” e de is razas de su logu comenti cuaddeddus de sa Giara e su cuaddu de su Sarcidanu.
“S’obbieticu chi tenit ‘Cavallinfiera’ – si ligit in d’una nota – est sa promozioni de su cuaddu e de is baloris chi rapresentat po totu sa Sardigna, po unu turismu respetosu de sa cultura, de su territoriu e de s’ambienti”.

Po ndi sciri de prus: info@cavallinfiera.it – www.cavallinfiera.it

Cunsórziu de Bonífica di Aristanis: Prato: "Imbidu a is traballantis a no firmai su serbíziu"

 

(IlMinuto) – Casteddu, 31 de su mes”e maju – Sa vertenza de su Cunsórziu de Aristanis at essi su tema de un’atóbiu tra s”Assessorau regionali de s’”Agricoltura” e sa Prefetura in programma oi in Aristanis.
In is diris passadas s’Assessori Andrea Prato at chistionau de sa cosa. “Imbidu a is traballantis de su Cunsórziu de Aristanis – at nau s’assessori de sa Giunta Cappellacci – a s’atacai a su sensu de responsabbilidadi chi at tentu finzas a oi e a no firmai su serbíziu de s’àcua po is massaius. Si puru ddoi siant arrexonis claras, no ddu su podeus giustificai si de s’àtera parti s’isciusciat sa vita de is aziendas de sa massaria. Si custas azionis ant a sighiri, nos eus a decídiri ita fai”.