> 2010 mes’e làmpadas | ilMinuto

Archìviu de mes'e làmpadas 2010

"Sa Tirrenia no lassit Arbatassa". Su Cumitau scririt a su presedenti Pilia: "S’economia ogiastrina est arrischendi de arrui mali"

(IlMinuto) – Casteddu, 30 de su mes”e làmpadas – Sa privatizazioni de sa Tirrenia arriscat de portai a s’esclusioni de s’iscalu ogiastrinu de is tretus de sa compagnia de nàvigu. Est cantu afirmat su Cumitau po s’isvilupu de su Portu de Arbatassa cun d’una lítera mandada a is síndhigus de is Comunus ogiastrunus e a su presidenti de sa Provìnzia Bruno Pilia.
“Sa timoria nostra – si podit ligiri in su documentu – est ca cun sa privatizazioni de sa sociedadi Tirrenia e su trasferimentu a sa Mediterranea Holding po su 37% in is manus de sa Regioni Secilia, ddoi siat su perígulu de pèrdiri is nais chi funt in serbíziu in su portu nostru”.
“Est de meda tempus – precisat su scritu – ca nos pedeus, senz”e tenni arrespustas beras de parti de is amministradoris de su territoriu e de cussus regionalis, un’interessamentu de su Ministeru a manera chi sa privatizazioni siat acapiada a mantèniri is tretus chi ddoi funt oi in tutela de is biaxadoris, siant custus citadinus privaus o imprendidoris.
Segundu su Cumitau, s’esclusioni de Arbatassa de is tretus de sa Tirrenia iat a podi portai a su crollu de s’economia de unu territoriu chi tenit giai unu tassu de disimpreu meda mannu.
“Su ndi liai is tretus – concluit su Cumitau – s’at a portai a fai unu passu agoa de 25 annus, fadendi arrui mali meda totu su sistema economicu de sa provìnzia e bocendi totus is investimentus fattus e is programmas po su tempus benidori. Sa política tenit su doveri morali de donai arrespustas a chini dógnia diri bogat su dinai po is pagamentas e no si bollit intendi citadinu de serie B, scéti fonti de votu po si pigai sa cadira in Provìnzia o in Regioni”.

Cínema. De su "Giardino dei limoni" a "Petropolis": unu mesi de "Bisionis solidalis" in Palazu "Ducale"

(IlMinuto) – Casteddu, 30 de su mes”e làmpadas – “Fai connosci in su territoriu is principius chi funt a fundamentu de unu modu de bivi prus sostenibbili in is cunfrontus de sa sociedadi, de s’ambienti e de s’arrespetu de is animabis”. Est custu chi animat sa rassigna “Associazioni al cinema – Visioni solidali”, in programma in Tàtari cumenzendi de cida chi benit.
De su 5 de su mes”e argiolas finzas a su 5 de su mes”e austu in su cortili de Palazu “Ducale” ant essi proietadas is pellículas propostas de is otu assózius (Ponti non Muri, Equomondo, noiDonne 2005, Amnesty International, Emergency, Intercanvi, Caritas e Greenepace Italia) chi ant a presentai is atividadis e is campagnas chi ddus bint impignaus in su territoriu.
Sa rassigna cinematogràfica promòvia de is grupus localis de is assózius, cun s’agiudu de s’assessori a sa “Cultura” de su Comunu de Tàtari, s’at a oberri lùnis chi benit a is 21.00 cun sa proiezioni de “Il giardino dei limoni”, presentau de “Ponti non Muri”. Su film – si ligit in d’una nota – proponit “unu cunsidériu craru asuba de is raportus incolliosus chi ddoi funt tra israelianus e palestinesus, cun d’una crítica meda forti a su sistema políticu e a is mezus de informazioni”. At a serrai su progetu sa proiezioni de su documentariu “Petropolis”, curada de Greenpeace.
Sa participazioni a s’eventu est gratis e oberta a totus.

Referendum: domínigu in Santa Justa nascit su "Comitato per il SI contro il nucleare in Sardigna"

(IlMinuto) – Casteddu, 30 de su mes”e làmpadas – A pagu mesis de su referendum s’afortiat sa boxi de sa genti sadra chi est contra a su nucleari.
Domínigu chi benit in Santa Justa (16.00, Centru de is giòvanus de su comunu) at a nasci difatis su “Comitato per il SI nella lotta contro il nucleare in Sardigna”.
S’iscopu de sa cosa – acrarant is aprontadoris de s’apuntamentu – est cussu de donai vida a unu “cumitau chi arregollat totus is adesionis possíbbilis senz”e barrieras de dutrina o de partidus, chi biat is citadinus, is amministrazionis de su territoriu, is forzas socialis e sindacalis, is traballantis e is azhiendhas piticas e mannas unius po difèndiri sa Sardigna e po stresiai is perígulus chi benint de su nucleari in difesa de su diritu de is Sadrus de decídiri asuba de custu tipu de sceberus”.
In s’atóngiu chi benit, forsis in su mes”e ladàminis, is eletoris ant a depi nai cussu chi pensant ananti a sa dimanda “Sei contrario all’installazione in Sardegna di centrali nucleari e siti per lo stoccaggio di scorie radioattive da esse residuate e preesistenti?”.
Is 16.286 firmas in apógiu de su referendum funti stetias arregortas a cumenzai de su mes”e totussantus de su 2009 de is militantis de Sardigna Natzione Indipendentzia, chi in su mes”e fiàrgiu passau ddas ant presentadas a sa Corti de Apellu de Casteddu.

Circustànzia Giordi: rinviu nou po s’isbarazu a sa marolla. Sighit s’arregorta de su dinai

(IlMinuto) – Casteddu, 30 de su mes”e làmpadas – Esti stetiu rinviau a 9 de su mes”e totussantus s’isbarazu de sa família Giordi in Santu Juanni Sruexu. Ariseru a mangianu su médicu at istabbiliu ca is cundizionis de saludi de su sennori Virgilio – in carrozina a pustis de ai tentu un’ictus a conca – no permitint po nudda s’isbarazu.
Is Giordi no funt a solus in custa batalla po su diritu a sa domu (sa domu insoru esti stetia bendia a s’asta po mori de is dépidus fattus de s’aziendha de propriedadi de sa família). Puru ariseru, comenti giai acontéssiu in su mes”e marzu e in su mes”e arbili, is Giordi ant arriciu sa solidariedadi de meda genti; genti chi at presidiau sa domu po impediri s’isbarazu a sa marolla.
De immoi a s’atóngiu don Tonino, su préidi de sa bidda, at a sighiri s’arregorta de su dinai po permítiri a su sennori Virgilio e a sa família sua de torrai a pigai sa domu de chini dd’at comporada a s’asta po pagu soddus.
“Seus meda mali postus – narat sa filla prus manna in d’una nota de Facebook – ma speraus in su bonu coru de sa genti. Teneus ancora unu pagu de tempus ma scideus ca no podeus andai ainnantis aici po sèmpiri”.

"Time in Jazz". S’aria est su tema de sa XXIII edizioni de su festival de Fresu

(IlMinuto) – Casteddu, 30 de su mes”e làmpadas – S’at a tenni de su 10 a su 16 de su mes”e austu s’edizioni nùmeru XXIII de su “Time in Jazz” in Sardigna, su festival de mesu istadi dirigiu de Paolo Fresu chi tenit comenti teatru Belchidda e calincunu centru lacananti de su Logudòro e de sa Gallùra.
“Sighendi su ciclu de cuatr’annus dedicau a is cuatru elementus de sa natura” – scrirint is aprontadoris – s’edizioni de su 2010 eligit “s’aria” a tema de sa manifestada musicali. Su caminu sighit, duncas, asuta de su signu de sa sustenibbilidadi de s’ambienti, inditendi s’andadura de is ispetàculus prus acapiaus a sa música e de is eventus ausiliàrius a is concertus, tra custus sa rassigna de film e documentarius curada de su regista Gianfranco Cabiddu.
Su palcu meda mannu allestiu in praza “del Popolo” in Belchidda at a aghilliri is concertus de su merì. Ma su “Time in Jazz”, comenti dogn’annu, s’at a movi “de su mangianu a tradu mannu ‘e noti in logus e ispàzius diversus, de is crésias de su satu a is cazas de su Monte ‘e Limbara” tochendi is comunus de Calanzanos, Codronzànus, Itirèddu, Monte, Mòres, Terranòa, Pathàda, Tèlti e Tèmpiu.
Su programma de su 2010 est arricu de nòmis meda importantis, tra custus ddoi funt: Ornette Coleman, Ralph Towner, Enrico Rava, Dhafer Youssef, Enrico Pieranunzi e Mario Brunello.
Est importanti puru ca su “Time in Jazz” de su 2010 at a tenni un’obertura singulari in cuncórdiu cun su tema de sa XXIII edizioni, su batiari de su progetu at essi difatis fattu in aria, asuba de unu bolu chi de Milanu Linate at a arribbai a Terranòa.