Archíviu de sa diri 8/09/2010
(IlMinuto) – Casteddu, 8 de su mes”e cabudanni – “Sa lota de bosàterus est, oi, sa nostra. Est sa lota po sa dignidadi de chini traballat sa terra, pesat e produsit cos”e papai. Est sa lota po no si ndi depi liai torra su capeddu a fac”e chini si iat a bolli moddis a agguantai una sorti chi no eus sceberau”. Cun custus fueddus – pigaus de is primus rigas de una longa lítera indiritzada “a is collegas, fradis e sorris pastoris impignaus in is mobilitadas in Sardigna” – su cordinadori natzionali de Altragricoltura, Gianni Fabbris, espressat solidariedadi a sa mobilitada de su “Movimento dei Pastori Sardi”.
(IlMinuto) – Casteddu, 8 de su mes”e cabudanni – Sa Fiat tenit una maladia meda gravi e at impestau puru Trenitalia: “no arrespetai is senténtzias de is tribbunalis”. Est cantu denunciat cun d’una nota su parlamentari de su Pd, Guido Melis. “Arribbant de diversas regionis italianas, e po su prus de sa Sardigna – afirmat Melis – is novas grais po su mancau arrespetu de is senténtzias de is tribbunalis, de sa setzioni traballu, de parti de Trenitalia”. “In medas casus de pagu tempus fait – acrarat Melis – su giugi de su traballu at stabbiliu su ripristinu de su stipendiu e de is incàrrigus de is lissentziaus, ma custu no est acontéssiu”.
(IlMinuto) – Casteddu, 8 de su mes”e cabudanni – Su no a sa “carestia-billetu”, sa lota de is precarius de s’iscola, sa mobilitada de is Ata Lsu. Funti stetias centinas is personis chi ariseru ant protestau a fac”e s’intrada de su Consillu regionali de sa Sardigna, asuta de is pórcius de bia Roma. Is istudiantis de s’Uds e de is “Giovani comunisti” ant arremaciau su no insoru a s’aumentu de su prétzius de is billetus de su Ctm e de s’Arst.
“Dimandaus – acrarant Uds e Gc, in d’una nota fatta impari – s’arretiru lestru de is aumentus cumentzaus su primu de su mes”e cabudannu passau. Bia sa necessidadi de recuperai risorsas po fai andai ainnatis su serbítziu – precisat sa nota – is istudiantis (70% de is utentis totslis) cuncondrant cun aumentus piticus e no cun aumentus de fora de conca chi tenint scéti s’intenztioni de fai cassa”.
Ant portau sa protesta insoru a fac”e s’assembrea de su pópulu sardu puru is traballantis de su “Coordinamento precari della Scuola Cagliari”. In Sardigna, in s’annu iscolasticu 2010/2011, ant essi 1.707, 1.037 maistus e 670 “Ata”, is traballantis bogaus de s’iscola púbblica gratzias a sa lei 133 de su 2008. A pagu metrus de su Consillu regionali, a fac”e sa sedi de sa Diretzioni Regionali Iscolastica Sarda, ant protestau puru 50 ex Lsu Ata, traballantis chi allichidiant is iscolas.
(IlMinuto) – Casteddu, 8 de su mes”e cabudanni – “Un’aumentu mannu de is bolus in regimi de continuidadi territoriali chi at a permiti a is sardus de arribbai in medas logus chi oi no funt incluius in custu tipu de prétzius”.
Est cantu previdit, segundu una nota de imprenta, su protocollu de inténdia asuba de sa continuidadi territoriali firmau ariseru in Roma de sa Regioni Sardigna, de su Governu e de s’Enac.
(IlMinuto) – Casteddu, 8 de su mes”e cabudanni – S’at a tenni su 12 de su mes”e cabudanni in Sini, in Marmidda, sa VI editzioni de s’Olimpiade de su giogu traditzionali de sa Sardigna. Po s’eventu, chi fait parti de sa manifestada “Marmilla Mille Emozioni”, ant a participai duxentus tra pipius e piciocus d’edadi tra is 5 e is 18 annus, chi s’ant a spassiai cun 23 giogus de sa traditzioni.
Is giòvanus ant essi spartzius is ses scuadras: is topis; is puddixeddas de àcua; is mraxianis; is pibitziris; is carrogas; e s’abila.
Social
