Prétzius in Casteddu: in su mes”e austu aumentat totu (o casi totu). Viagiai est sèmpiri prus una carestia (+1,6%)

(IlMinuto) – Casteddu, 1 de su mes”e cabudanni – In Casteddu su costu de sa vida sighit a aumentai. In su mes”e austu s’índixi de is prétzius a su consumu, fattu connosci ariseru de su Serbítziu ‘Informatica e Statistica’ de su Comunu, est difatis aumentau de su 0,4 po centu.
S’aumentu corpit medas cumpartus: sa cos”e papai e cuss’e bufai. Po is bufóngius senz”e arcol s’aumentu est de su (+0,5 %), po is arcólicus e is tabbacus est de su (+0,3%), is ispesas po sa domu, s’àcua, s’elétricu e is combustíbbilis funt de su (+0,4%), is comunicatzionis aumentant de su (+0,6%) e is “serbítzius de arricida” e is ristorantis de su (+0,4%). Aumentus mannus in su cumpartu de is trasportus: a pustis de su +1,7 de su mes”e argiòlas, in su mes”e austu is prétzius funt crescius ancora de s’1,6%.
Is prétzius s’amenguant scéti in su cumpartu “ispàssiu, ispetàculu e cultura” (-0,2%). In su mes”e austu su costu de sa sanidadi, de sa cos”e bistiri, de s’istrutzioni e de is “atèrus benis e serbítzius” est in veci abarrau frimmu.
S’índixi tendentziali de is prétzius a su consumu po totu s’annu in su mes”e chi est acabbau de pagu at signau unu +1,3%, in abbentu si cunfrontau a su +1,7% de su mes”e argiòlas.