> Arrumpellamentu nou in su Cpa de Su Masu. Arrestaus e pistaus diversus immigraus. aMpI: “Itàlia logu ratzista furiosu”. Sinistra critica: “Serrai debressi cussu presoni” | ilMinuto

Arrumpellamentu nou in su Cpa de Su Masu. Arrestaus e pistaus diversus immigraus. aMpI: “Itàlia logu ratzista furiosu”. Sinistra critica: “Serrai debressi cussu presoni”

repressione etracomunitari cagliari elmas(IlMinuto) – Casteddu, 12 de su mes”e ledàminis – Dexi “clandestinus” arrestaus e unus cantu immigraus pistaus. Est custu su bilànciu de su scontróriu de s’arrumpellamentu de pagu prus de 100 furisteris aghillius in cussu ca lamant “Centru de primu acasàgiu” de Su Masu.
Ariseru a merì is immigraus – arrebbellendusì po sa terza borta in dexi diris – funt arribbaus fintzas a sa pista de s’Aereoportu civili. Su scalu casteddaiu est abarrau serrau a su tràvigu de is 14.00 a is 17.00. “S’Itàlia est unu logu ratzista e furiosu. Est una brigúngia – cummentat cun d’una nota su Diretivu de aMpI – ca sa Sardigna, de sèmpiri terra de scàmbiu tra culturas e pópulus diversus, siat custrinta de s’Itàlia ratzista e xonofoba a inserrai ànimas in cica de unu traballu, de una possibbilidadi, de un’ispériu de fuida de su fàmini e de sa gherra! A Manca pro s’Indipendentzia est totalmenti a cuncordiu cun s’arrumpellamentu de is immigraus e retennit aggraviosu sinterventu de is fortzas d’ocupatzioni militaris italianas cun lagrimogenus e manganellus contra a personis cun is manus nudas”. Asuba de s’acuntéssia at fueddau cun d’una nota puru Sinistra Critica, organizatzioni anticapitalista. “Sinistra Critica sarda – si ligit in d’una nota fatta connosci de su cumpartu informatzioni de s’organizatzioni – pedit debressi sa serradura de su Cpa de Su Masu e espressat sa màssima solidariedadi a is immigraus inserraus in custu beru e própriu presoni. Vìtimas de unu beru e craru ‘ratzismu istitutzionali’, fattu de leis chi cunstringint custus poberus a si cuai, leis chi bocint is furisteris. Vìtimas de is aparatus malus de su Stadu a su serbítziu de is políticas sèmpiri cun prus craresa ratzistas e xonofobas”.

© RIPRODUZIONE RISERVATA

0 Arrespustas a “Arrumpellamentu nou in su Cpa de Su Masu. Arrestaus e pistaus diversus immigraus. aMpI: “Itàlia logu ratzista furiosu”. Sinistra critica: “Serrai debressi cussu presoni””


Is cummentus funt serraus.