> Ddl. Sighit sa mobilitada de is istudiàntis sardus. Melis: “No acetaus s’irminorigamentu de s’Universidadi púbblica” | ilMinuto

Ddl. Sighit sa mobilitada de is istudiàntis sardus. Melis: “No acetaus s’irminorigamentu de s’Universidadi púbblica”

melis(IlMinuto) – Casteddu, 26 de su mes”e totussantus – Sighit sa mobilitada de is istudiantis universitarius contra a su ddl Gelmini. In Casteddu – mentris est acabbendi sa reunioni de su Senau académicu – funt sèmpiri prus numerosus is istudiantis chi ocupant sa crabatura de su Palatzu de is Sciéntzias. Su presídiu contra a sa Riforma – esti stetiu acrarau – at a sighiri assumancu fintzas a martis, candu su provedimentu at a torrai a s’esàminu de sa Camera. Su no a sa riforma Gelminia at biu comenti protagonista puru is istudiosus e is retoris de is ateneus de sa Sardigna. “No si podit acetai – at nau su retori de s’Universidadi de Tàtari Attilio Mastino – chi si siat fueddau po mesis de emendamentus chi a pustis funti stetius scancellaus cun d’unu nudda. Su disignu de lei chi iat a depi essi aprovau de su Parlamentu est perigulosu po s’Universidadi púbblica e de prus po is ateneus de meridioni. Sa Sardigna nd’iat a podi pagai is cusseguéntzias prus malas: is ateneus de Tàtari e Casteddu arriscant de morri”. Frimmu puru su retori de s’Universidadi de Casteddu, Giovanni Melis. “In sedi Crui – at acrarau Melis – at nau ca no si podint ignorai is arrexonis de su disacórdiu manifestau de istudiantis e istudiosus, preocupaus po su tempus benidori de  s’Universidadi in Itàlia. No si podit acetai un’irminorigamentu de s’Universidadi púbblica”.

© RIPRODUZIONE RISERVATA

0 Arrespustas a “Ddl. Sighit sa mobilitada de is istudiàntis sardus. Melis: “No acetaus s’irminorigamentu de s’Universidadi púbblica””


Is cummentus funt serraus.