> 2010 mes’e paschixèdda 01 | ilMinuto

Archíviu de sa diri 1/12/2010

Senz”e stipendiu de su mes”e austu: torrat a cumentzai sa lota de is traballantis Geas. Pcl: “Giunta trapassera”

stipendi(IlMinuto) – Casteddu, 1 de su mes”e paschixèdda – “Seus arrennescius a otèniri is risorsas po acastiai is postus de traballu de totus is oràjus”. Dd’iat nau in su merì de su 28 de su mes”e ledàminis s’assessori regionali de is Trasportus, Angelo Caria, po cumbinci a is traballantis de sa Geas a lassai sa crabatura de s’istatzioni de is trenus de Casteddu. A prus de unu mesi de distàntzia is fueddus de su rapresentanti de sa Giunta regionali no si funt ancora trasformaus in fatus e is traballantis chi allichidint is trenus de sa Sardigna ant torrau a pigai sa lota: no arricint su stipendiu de su mes”e austu. Ariseru a merì esti stetiu blocau unu trenu in parténtzia de Casteddu po Santu ‘Engiu. Custu mangianu, tra is 7.40 e is 8.30, is operàjus ant blocau su tràvigu de sa ferruvia in essida e in arribbu in Casteddu (seti is trenus annullaus). S’istatzioni de Casteddu est presidiada diri e noti. Sighi a ligi ‘Senz”e stipendiu de su mes”e austu: torrat a cumentzai sa lota de is traballantis Geas. Pcl: “Giunta trapassera”’

Incidentis in su traballu. Costa (Cgil): “Sistemas de seguresa pagu adatus, est foras de conca chi un’operàju morrat strecau de una barca”

cgil(IlMinuto) – Casteddu, 1 de su mes”e paschixèdda – “Ancora una borta assisteus a un’incidenti mortali in su traballu, chi dimustrat a totus cantu siat pagu adatu su sistema de régulas e controllus chi depit assegurai sa seguresa de totus is traballantis”. Cun custus fueddus su segretàriu regionali de sa Cgil, Enzo Costa, cummentat sa morti in su traballu de s’operàju Franco Conti, acontéssia ariseru in cantieri navali de Terranòa. Conti, 63 annus, est mortu strecau de una barca in linna meda manna. Sighi a ligi ‘Incidentis in su traballu. Costa (Cgil): “Sistemas de seguresa pagu adatus, est foras de conca chi un’operàju morrat strecau de una barca”’

Referendum po su nucleari, aMpI presentat is arrexonis de su SI in Onièri

a manca pro s'indipendentzia(IlMinuto) – Casteddu, 1 de su mes”e paschixèdda – “No a su nucleari eja a sa soverania”: est custu su títulu de sa campagna po su referendum de a Manca pro s’Indipendentzia abetenti su votu de su beranu chi benit, candu is sardus ant essi lamaus a arrespundi a sa dimanda: “Sei contrario all’installazione in Sardegna di centrali nucleari e siti per lo stoccaggio di scorie radioattive da esse residuate e preesistenti?”. Cras a merì su diretivu políticu de aMpI at a presentai is arrexonis de su Sì in Onièri. S’apuntamentu est fissau po is 18.00 in s’àula de su consillu de su Comunu in provìntzia de Nùgoro. Sighi a ligi ‘Referendum po su nucleari, aMpI presentat is arrexonis de su SI in Onièri’

Ddl Gelmini. Corteu nou in Casteddu. Sdel: “Bolleus s’indipendentzia de s’imparamentu sardu”

istruzione(IlMinuto) – Casteddu, 1 de su mes”e paschixèdda – Unu corteu partiu de s’àula 1 de sa Falcotadi de Ingenneria po arribbai in sa sedi de su Consillu regionali. In custu modu ariseru a mangianu pagu prus de 300 istudiantis de s’Ateneu casteddaiu ant nau ancora una borta no a sa riforma Gelmini, chi, aprovada in su merì de sa Camera, at a passai torra a s’anàlisi de su Senau. Contra a sa riforma de su Guvernu Berlusconi fueddat puru Sdel. Su grupu de is giòvanus de Sardigna Natzione Indipendentzia denunciat su caràtiri neoliberista de sa riforma, cun s’intrada de is privaus in su Cda, e proponit un’arretzeta indipendentista po torrai a fai bivi s’imparamentu púbblicu in Sardigna. Sighi a ligi ‘Ddl Gelmini. Corteu nou in Casteddu. Sdel: “Bolleus s’indipendentzia de s’imparamentu sardu”’

In s’ExMa “Musica – Arte – Danza”: arregorta de dinai in faori de s’Onlus Sardigna Sclerosi Multipla

(IlMinuto) – Casteddu, 1 de su mes”e paschixèdda – S’Onlus Sardigna Sclerosi Multipla at aprontau po sàbudu 4 de su mes”e paschixèdda (16.30, ExMa de Casteddu) sa manifestada “Musica – Arte – Danza”. S’eventu tenit s’iscopu de arregolli dinai in faori de sa Sam. S’Onlus Sardigna Sclerosi Multipla apogiat s’iscoperta de Paolo Zamboni asuba de sa Ccsvi, maladia acapiada a sa Sclerosi Multipla. Cust’arregorta de dinai – si ligit in d’una nota – “serbit po pigai un’importanti machinàriu, s’ecocolordoppler, po sa diàgnosi e po s’imparu de is médicus chi ant a intevenni in basi a su protocollu Zamboni”. Sighi a ligi ‘In s’ExMa “Musica – Arte – Danza”: arregorta de dinai in faori de s’Onlus Sardigna Sclerosi Multipla’