> In Biddaxidru I editzioni de sa “Festa de is agrùminis” | ilMinuto

In Biddaxidru I editzioni de sa “Festa de is agrùminis”

medio campidano(IlMinuto) – Casteddu, 16 de su mes”e paschixèdda – At a cumetzai cras in Biddaxidru e at a durai fintzas a su 19 de su mes”e paschixèdda sa primu “Festa de is agrùminis” – Aparada agroalimetari asuba “Is bonesas de su Linas”. Sa manifestada at essi – si ligit in d’una nota – “un’ocasioni po iscobèrriri su centru istoricu comunali, cun is particularidadis architetonicas e cun is scrusórgius de sa traditzioni de su logu allogaus aitru de is domus”. S’eventu est aprontau de s’Assótziu “I Vicinati” de Biddaxidru, cu s’agiudu de s’amministratzioni comunali e de sa Provìntzia de su Campidanu de Mesu. Sa tres diris at a cummentzai, in su merì de su 17, cun s’obertura a su púbblicu de is domus de su centru istoricu chi ancora oi allogant ogetus de sa traditzioni de su logu e de is ispàtzius de aparada allestius in is istradas. Medas is mostras chi su bisitatori at a podi castiai: sa Mostra de is Calendàrius e de is Fotografias Aeroportu Trunconi in Domu Desì; sa Mostra ‘pomologica’ asuba de is diversas variedadis de agrùminis, obias, figutzíndia e méndua; sa Mostra de autoris e artistas cidresus; cussa de su pani e de is drucis; sa Mostra de moto d’època; s’aparada dedicata a is minieras, a is mineralis e a is ferramentas de sa miniera; sa Mostra de is presépius; cussa de su scultori Efisio Pisano; sa Mostra de pintura de Giuseppe Dessì, sa Mostra de su costùmini de Biddaxidru; sa Mostra de cardulinus e sa Mostra de is prodotus de su Scarteddu de su Campidanu de Mesu. Diversus ant essi puru is momentus dedicaus a is atastus de is cosas bonas de su logu. A s’acabbada de sa manifestada s’at a tennii su cuncertu de fin”e annu de sa Banda Musicali de Biddaxidru.

© RIPRODUZIONE RISERVATA