> “Cherimus s’iscola sarda” Sa proposta de aMpI a pustis de 150 annus de “italianizazioni” | ilMinuto

“Cherimus s’iscola sarda” Sa proposta de aMpI a pustis de 150 annus de “italianizazioni”

a manca pro s'indipendentzia(IlMinuto) – Casteddu, 17 de su mes”e paschixèdda – “Costruiri un’iscola e un’Universidadi chi pongant a su centru sa língua e s’economia traditzionali. Est custu su progetu de a Manca pro s’Indipendentzia po s’istrutzioni de s’Ísula, a pustis de “150 annus de iscola italiana in Sardigna”. “Cun su ddl Gelmini – scririt su Diretivu políticu natzionali de aMpI – arribbat a cucuru su progetu de sciàsciu de s’iscola e de s’Universidadi púbblica italiana. A pustis de 150 annus de iscola italiana in Sardigna, de scontróriu meda malu in is cunfrontus de língua própria de is sardus e de s’addotrinamentu de is giòvanus sardus bófiu po italianitzai a sa marolla sa Sardigna, is arrisurtaus, si castiaus a su livellu de istrutzioni de su pópulu sardu [...] funt disastrosus e crarus”. S’organizatzioni de sa sinistra indipendentista proponit duncas de costruiri un’iscola sarda chi tengat comenti coru sa língua e is produtzionis istoricas – cun “s’imparamentu de su sardu, e in sardu ant a depi essi  totus is iscolas de dógnia órdini e gradu” – e  “cun sa trasformatzioni manna de is facoltadis ténnicu scietificas e de s’imparamentu ténnicu professioneri”. “Custu at a essi possíbbili – concluit su documentu – scéti si is giòvanus ant a lotai po assegurai unu tempus benidori a cussu ‘e totu e a sa terra nostra, senz”e chi is sardus depant prus mendigai limúsinas a s’Itàlia, comenti s’ant abituau a fai in custus sessant’annus is partidus e is sindacaus italianistas”.

© RIPRODUZIONE RISERVATA

0 Arrespustas a ““Cherimus s’iscola sarda” Sa proposta de aMpI a pustis de 150 annus de “italianizazioni””


Is cummentus funt serraus.