> Lota de is pastoris: allevadoris de Mps “scicutaus” in su portu de Civitavecchia | ilMinuto

Lota de is pastoris: allevadoris de Mps “scicutaus” in su portu de Civitavecchia

(IlMinuto) – Casteddu, 28 de su mes”e paschixèdda – S’arrexinau arringheramentu de poliziotus, carabineris e finazieris cuncodraus cun s’atintosomossa e cun in is manus is manganellus. Est s’acasàgiu chi custu mangianu a is 6.00 is pastori sardus de Mps ant agatau in su portu de Civitavecchia.
Ariseru a merì si furiant imbarcaus in 300 asuba de nai essida de Terranòa cun s’intentzioni – at precisau su leader de Mps Felice Floris – de portai in Roma sa protesta insoru e ammostai is arrexonis e is propostas insoru a s’imprenta, forsis a fac”e su Ministeru de is Políticas agriculas.
Is “fortzas de s’órdini” ant perou blocau is allevadoris in su portu, scicutendu is cincu pullman annolitaus de Mps. In su scalu laziali si funt insaras biuvis momentus de tensioni, cun atzufatórius e duus manifestantis blocaus e a pustis torraus a lassai. A is pastoris de Mps – chi po medas oras ant blocau sa nai de su sbarcu – no esti stetiu nemmancu consentiu e arribbai in sa capitali in trenu. “S’Itàlia – cummentat su diretivu políticu natzionali de aMpI – at arrespustu comenti scéti scit arrespundi a is traballadoris, meda de prus si pastoris sardus, chi manifestant po pediri unu cunfrontu”. Difatis sa polizia ddis at proibbiu de podi artziai in is trenus, de arribbai in su logu cuncodrau de s’apuntamentu cun is pullman giai annolitaus, e ant puru pensau de donai calencunu cropu de manganellu e de frimmai ddus manifestantis po ddus impitai comenti frenu e comenti cosa ‘e scàmbiu po frimmai debressi sa protesta de is pastoris”.

© RIPRODUZIONE RISERVATA

1 Arrespusta a “Lota de is pastoris: allevadoris de Mps “scicutaus” in su portu de Civitavecchia”


Is cummentus funt serraus.