> Polìgonu “Salto di Quirra”: “Su 65% de is pastoris maladius de cancru de su sànguni”. ‘Gettiamo le basi’: “A candu su monitoraggiu asuba de totu sa genti” | ilMinuto

Polìgonu “Salto di Quirra”: “Su 65% de is pastoris maladius de cancru de su sànguni”. ‘Gettiamo le basi’: “A candu su monitoraggiu asuba de totu sa genti”

quirra(IlMinuto) – Casteddu, 4 de su mes”e gennàrgiu – Su demóniu donat is pingiadas e no is cobertoris. Nonostanti “su dópiu rolu de controllori e controllau fattu de is Fortzas Armadas, de su Ministeru de sa Difesa e de sa Nato”, su Monitoraggiu de su Polìgonu “Interforze Salto di Quirra” at donau aicitoru arrisurtaus de foras de conca. Ddu denunciat cun d’una nota su Cumitau sardu “Gettiamo le Basi”. Po su prus – segundu cantu precisat custu mangianu “l’Unione Sarda” – segundu su relatu scritu de is veterinàrius de sa Asl de Lanusè e de Casteddu, in s’area is angionis nàscius istrupiaus funt unu númeru meda prus mannu de su normali e su 65 po centu de is pastoris est maladiu de su cancru de su sànguni. “Su méritu de sa Asl – precisat in d’una nota Mariella Cao – afortiat sa dimanda asuba de su motivu chi at fattu passai unu tempus de dex’annus primu de fai cust’importanti arregorta de datus e ancora asuba de su motivu chi no bit nesciunu spricullitu sanitàriu de sa genti chi bivit ingunis”. Su controllu de s’area – acrarat “Gettiamo le basi” – esti stetiu donau a cincu ditas, chi no sémpiri ant impitau istrumentus de su mantessi potentivu. Si su monitoraggiu fattu cun microspopius capacis de ammanniai de 120milla bortas at permitiu de remarcai sa preséntzia de nanoparticellas acapiadas a s’atividadi militari de Quirra fintzas in Baunei, su controllu in s’area de su Polìgonu – fattu cun d’unu microscopiu capaci de ammanniai scéti de 8milla bortas – no at remarcai nesciuna nanoparticella.

© RIPRODUZIONE RISERVATA

0 Arrespustas a “Polìgonu “Salto di Quirra”: “Su 65% de is pastoris maladius de cancru de su sànguni”. ‘Gettiamo le basi’: “A candu su monitoraggiu asuba de totu sa genti””


Is cummentus funt serraus.