> Intradas. S’istória senz”e fini de una contienda de 10 milliardus de eurus | ilMinuto

Intradas. S’istória senz”e fini de una contienda de 10 milliardus de eurus

(Chistionis e Opinionis) – Casteddu, 31 de su mes”e martzu – “S’abetat unu camminu prenu de perígulus e de afrascus, ma seus a su bótiu decisivu”. Cun custus fueddus su presidenti de sa Regioni, Ugu Cappellacci, serrat sa setziada de su Consillu regionali de su 16 de su mes”e martzu. Una setziada dedicada a sa “contienda intradas”. Unu de is temas chi prus funt buddendi in sa política de is úrtimus cinc’annus e chi forsis oi, est agatendi sa luxi. De ita seus fueddendi? S’artículu 8 de su Statutu ispeciali de sa Sardigna – una fibera de normas de su mantessi valori giurídicu de sa Costitutzioni – istabbilit chi “is intradas de sa regioni funt costituias de is seti déximus de su ghétidu de is pagamentas asuba de su rédditu de is personas fisicas” e de àteras ratas, de àteras pagamentas e de s’IVA. Ma su Stadu – no si cumprendit beni a cali títulu – no torrat a sa Sardigna su 70 po centu de s’Irpef e de is àteras intradas in giogu. Segundu cantu narat unu studiu de sa Fundatzioni Agnelli, giai in su 2004 su Stadu depiat a sa Sardigna una cifra de pagu prus de 10 millionis de eurus. Set’annus fait su movimentu indipendentista Irs fait bessiri a pillu sa chistioni e proponit una solutzioni: aplicai s’artículu 9 de su Statutu e fai un’Agentzia de sa Regioni Autónoma de sa Sardigna po is Intradas (Arase) un’enti de coberantza. In custu modu is risorsas iant a abarrai in Sardigna e sa chistioni iat essi resòlvia. In su 2005 Renatu Soru fait de sa “contienda intradas” una de is batallas prus importantis de sa Giunta regionali, arribbendi a s’annu infatu a firmai un’acórdiu cun Romano Prodi. Un’acórdiu chi abarrat in su paperi. In custus annus su Stadu sighit a no torrai a sa Sardigna su 70 po centu de s’Iva e de totu s’àteru. E su dépidu sighit a cresci. S’8 de su mes”e martzu de ocannu s’arribbat a una possíbbili furriada. In custa data sa Cummissioni paritetica Stadu-Regioni oberrit is ennas a is normas de atuatzioni de s’artículu 8 de su Statutu. Contus in manu sa Sardigna iat a podi arriciri 5,4 milliardus de eurus po su 2011. Ma a is normas de atuatzioni mancat ancora s’aprou de su Consillu de is ministrus. Cappellacci etotu fueddat de “perígulus e afrascus” e parrit ca no si fidit de su Guvernu “amigu”. “Po si prexai – cummentat Chicco Porcu de su Pd – no at a bastai s’aprou de is normas de atuatzioni de parti de su Consillu de is ministrus, ma eus a depi abetai sa mudífica de su bilànciu de su Stadu”.

E ita ndi pensais bosàterus?

Scàrriga custa nova

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda

RAS

© RIPRODUZIONE RISERVATA

2 Arrespustas a “Intradas. S’istória senz”e fini de una contienda de 10 milliardus de eurus”


  • Deo penso chi custa no est chistione de manca o dresta in Italia… Cando b’at de arrabinare in terra nostra, addolumannu, custos furones parent totu frades. Deo creo chi innantis de bìdere cussu dinari nos at a crèschere s’arva (deo la jito ja longa duncas mi che l’apo a bìdere in pes)… ant a istare a su tira-tosta pro annos muntenzende·nos chin su cannaitu ligadu a bula. Pius fàtzile diat èssere a pònnere custu dinari chi nos devent in contu cando amus a partire terrinos e depidos (ca sa Sardigna puru at parte in su dèpidu prubicu), ma pro fàghere custu bisonzat innantis de fàghere sos sardos.

  • Deu no cumprendu beni sa chistioni. S’accordu tra su Stadu e sa Regioni sarda esti mellus de su chi c’esti tra su Stadu e is atras Regionis o peus? Chi esti mellus ( o peus) poita no esti su propriu po dogna Regioni? Comunque chi s’artículu 8 de su Statutu ispeciali de sa Sardigna istabbilit chi “is intradas de sa regioni funt costituias de is seti déximus de su ghétidu de is pagamentas asuba de su rédditu de is personas fisicas” e de àteras ratas, de àteras pagamentas e de s’IVA aicci depir’essie no si cumprendit beni poita su Stadu no torrat a sa Sardigna su 70 po centu de s’Irpef e de is àteras intradas in giogu. Sa storia de is normas de atuatzioni esti un amanera po no pagai immoi.

Is cummentus funt serraus.