> Su tempus benidori de s’àcua. Sa Sardigna tra referendum e privatizatzioni | ilMinuto

Su tempus benidori de s’àcua. Sa Sardigna tra referendum e privatizatzioni

Ascurta custa nova

(Chistionis e Opinionis) – Casteddu, 5 de su mes”e martzu – De chini est sàcua? In su beranu chi benit, forsis in su mes”e làmpadas, is sardus ant essi lamaus a arrespundi a duus referendum natzionalis, est a nai a is referendum asuba de sa gestioni de su serbítziu ídricu. In su 2010 unu millioni e cuatruxentusmilla citadinus ant firmau is referendum “po ndi liai sa gestioni de su serbítziu ídricu de su mercau e po ndi liai cussu chi est diventau su torracontu de s’àcua”, scancellendi sa lei 133 de su 2008 e sa lei de su 2009 po sa privatizatzioni de is serbítzius púbblicus de su territóriu. Po is aprontadoris de is referendum, in is citadis comenti Arezzo e Latina, chi ant intregau sa gestioni a is privaus, is prétzius de s’àcua funt crescius fintzas a su 300 po centu, cun d-unu peoramentu mannu de su serbítziu. Puru in Berlino dda pensant aici. A pustis de dex’annus de s’intregu de su serbítziu a is privaus, cun aumentus mannus de su prétziu de s’àcua, su 98,82 po centu de is citadinus de sa primu citati tedesca at decidiu de torrai a donai sa gestioni de su serbítziu a su Comunu. A cantu scririt s’economista indiana Vandana Shiva in su líbburu “Le guerre dell’acqua”, pubblicau de Feltrinelli, “s’àcua est diventada un’afari mannu po is multinatzionalis [...]“. I duus protagonistas principalis de s’industria ídrica funt duas multinatzionalis francesas chi tenint imperus mannus e chi trisinant a 120 stadus. E in Sardigna? In s’Ísula su serbítziu ídricu est gestiu de Abbanoa, Spa de propriedadi de is comunus sardus e de sa Regioni Autónoma de sa Sardigna. Ma puru po Abbanoa sa possibbilidadi de béndhida a is privaus est cuncreta. De is primus de su mes”e fiàrgiu, cun su 98,85 po centu de is votus in faori, is atzionistas ant incarrigau a su cda de cumetzai is proceduras po donai su 40 po centu de sa sociedadi a is privaus, comenti previdit própriu sa lei 166 de su 2009. “Sa Regioni – iat precisau in su mes”e paschixèdda de su 2009 s’assessori regionali de su Bilànciu Giorgio La Spisa – no tenit nisciuna intentzioni de passai a privatizatzionis fortis”. Ma sa chistioni est ancora oberta. Sa béndhida est difatis blocada fintzas a s’esitu de su referendum. Bosàterus ita ndi pensais?

Scàrriga custa nova

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda

RAS

© RIPRODUZIONE RISERVATA

8 Arrespustas a “Su tempus benidori de s’àcua. Sa Sardigna tra referendum e privatizatzioni”


  • Un’atru dannu mau cussu de s’acua. Tocat a fai calincuna cosa po firmai a custr’atru sciasciu, votaus po custu puru, mancai esti unu referendum italianu, copit a nos puru, a genti sarda ca est giai pobera…

  • deu non cumprendu su motivu de fuliai dinai cun referendum s’acua esti unu diritu a da tenni chenza spendi dinai, esti unu beni mannu de totus is cittadinusu, logicu si depidi votai, ma no esti giustu a dai donada a is privausu e nemancu a Abbanoa esti un errori.

  • Deu da pensu cument ‘e Mariu. S’acua deppiri atturai unu beni de tottus. Is referendum ciccanta de frimmai sa privatizzatzioni chi olliri su Governu.

  • deu pensu comenti Gigi, e dopu chi apu ligiu custu pezzu e apu ligiu de Arezzo e Latina seu timendi, bisogiada a votai, no ci esti dinai, custu no esti unu giogu e funti gioghendi cun is italianusu custus chi ci guvernanta

  • S’acua esti unu beni pubblicu indispensabili. Esti unu dirittu a da tenni chenza spendi dinai prus de su chi serbiri po da arregolli e portai in dogna domu. S’acua però esti puru unu beni chi spacciara e quindi non bandara sprecara. Toccara a fai in manera che dogna citadinu possara spacciai s’indispensabili a pretziu basciu o a gratis. S’atra acua bandara fatta pagai a caru pretziu. Essiri arricus no est una arrexioni giusta po disperdi unu beni pretziosu. A is referendum toccara a votai po mantenni s’acua a fora de su mercau. Toccara puru fai in manera che sa gestioni siara bona. S’efficienza de sa gestioni deppiri essi controllara de is citadinus e chi no esti bonu a traballai beni (traballadori o dirigenti) bandara bogau.

  • Bah, segundu mimi si depeus arrebbellai. Giai custa cosa de s’acua e cussa de su nucleari funt duas arrexonis giustas po ddu fai. Si funt pighendi a carcadas de pei e nos si ddu seus faendi fai… Eus a benni a biri comenti ant a andai custus referendum, prusatotu cussu de su nucleari, ca mi parrit maucheddu meda. Custu ddu nau po chistionai scéti de custas duas cosas.

  • Candu mi beniri siri, torru a pensai a custa chistioni de sa privatizzazioni de su beni primariu de is ominisi, e mi furria sa giornara.

Is cummentus funt serraus.