> 1 de su mes’e maju de su 2011. Is festas de is traballadoris in s’Ísula de su disimpreu | ilMinuto

1 de su mes’e maju de su 2011. Is festas de is traballadoris in s’Ísula de su disimpreu

Primo maggio in Sardegna(Chistionis e Opinionis) – Casteddu, 30 de su mes”e arbili – Su 44,7 po centu de disimpreu tra is giòvanus e scèti s’annu passau, 17 mortus in su logu de su traballu, sa crisi de sa massaria, de sa pastoria e de s’industria. Est custu su cuadru chi bit sa Sardigna de su 2011 celebrai sa Festa internatzionali de is Traballadoris, a 125 annus giustus giustus de su 1 de su mes’e maju de su 1886, diri chi bidiat sa politzia de Chicago sparai asuba de is operàjus in isciòpiru generali po oteniri sa diri de travallu de ot’oras. Puru ocannu sa crisi económica de sa Sardigna e is temas internatzionalis funt in su coru de is diversus apuntamentus in programma in s’Ísula. Sa cuinta editzioni de sa manifestada aprontada de Sa mesa ‘e su primu maju – in programma in Cossoine – at a tratai temas de atualidadi comenti cussu de “Su mundu arabu tra rebbellia e colonialismu nou” e cussu de “s’impossìbili capitalismu birdi”. S’apuntamentu de Sa mesa s’at a serrai cun s’ispetàculu poéticu-teatrali “Barones sa Tirannia” e su concertu de sa Banda Bassotti in s’Anfiteatru comunali. In provìntzia de Tàtari ddoi at essi puru sa Festa de sos Tribagliadores sardos, aprontada de Su sindacadu de Sa Natzione sarda in Pòrtu Turre. In su parcu de Santu Baìngiu est is programma, a is 10.00 de su mangianu, unu dibbàtidu chi tenit comenti tema “Torrai a concuistai sa soverania natzionali po su traballu, s’amparu de s’ambienti e sa democratzia”, cun sa participazioni de calencunu tra is magioris rapresentantis de is movimentus indipendentistas e de is organizatzionis chi funt contr’a sa militarizatzioni e de cussas ambientalistas. In sa provìntzia de Aristanis est de signalai “Luxis e pubas”, su primu de su mes’e maju aprontau in Terraba de s’assótziu Rizoma e de sa Consulta giovanili de sa bidda. Una festa chi s’at a oberri custumerì a is 17.00 in su Teatru cívicu cun sa proietzioni de su film “Cattedrali di sabbia” de Paolu Carboni – bincidori de sa rassegna “Il cinema racconta il lavoro” – e at a sighiri cras cun su concertu in pratza Libertadi. Puru in su Meridioni de s’Ísula, in Sestu, sa Festa de is Traballadoris est marcada de sa música, cun is ispetàculus – in pratza primu maju – de is Offlaga Disco Pax e de Giorgio Canali & Rossofuoco.

E bosàterus ita ndi pensais?

Scàrriga custa nova

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda

RAS

© RIPRODUZIONE RISERVATA

3 Arrespustas a “1 de su mes’e maju de su 2011. Is festas de is traballadoris in s’Ísula de su disimpreu”


  • Cun su 44,7 po centu de disimpreu tra is giòvanus, sa crisi de sa massaria, de sa pastoria e de s’industria sa festa de su primu de su mes’e maju de s’annu chi beniri toccara a d’izzerriai ‘Sa festa de chini iara bolli traballai’. Toccara a s’arrebbellai , poita una sotzierari cumenti sa sotzierari italiana ( e non scieti) de oi no serbiri. Su traballu chi c’esti toccara a du dividi tra tottus. Tottus teninti su dirittu de bivi de su propriu traballu e decentementi.

  • stau ca ddoi est pagu de afestai in Sardigna e in is logus de disterru puru…No biu futuru de luxi totu parridi frimmu e studau

  • e mancu male, eja a dolu mannu…itt’ischifu e zente….istaebos bene tottu cantos

Is cummentus funt serraus.