> 2011 mes’e arbili 19 | ilMinuto

Archíviu de sa diri 19/04/2011

Sardigna e crisi económica: sa disfida citia citia tra industria pesanti e ambienti

(Chistionis e Opinionis) – Casteddu, 19 de su mes”e arbili – Eurallumina e Vinyls. Funt custus is capítulus de sa crisi de s’industria in Sardigna chi agataus in su coru de is úrtimas crònacas. Est frimma de duus annus sa fàbbrica de óssidu de allumíniu de Portovesme, cun pagu prus de 400 traballadoris in cassa integratzioni. De cida passada, a pustis de diris e diris de lota, sa contienda, forsis, parrit arribbada a unu furriadroxu. Su Ministeru de s’Isvilupu económicu at donau a sa Rusal – multinatzionali russa meri de s’aziendha – 18 mesis po torrai a fai partiri is impiantus. Agoa de 420 diris de s’ocupatzioni de s’ex presoni de S’Asinàra, no parrit invecis agatai una solutzioni sa contienda Vinyls. Is svizzerus de sa Gita no scéti no ant donau is 100 millionis de eurus necessàrius po pigai is impiantus in Sardigna e in Venetu comenti boliant is acórdius, ma a s’apellu macat puru su dinai po pagai is stipéndius de su mes’e fiàrgiu e de su mes’e martzu. De su blog de s’Ísula de is Cassintegraus si denunciat sa “totali incapacidadi de su Ministru Romani, su cumportamentu pagu bellu de Gita e sa malacreméntzia de Eni, chi cun sa complicidadi de su Guvernu est arrennescia a fai falliri s’operatzioni de béndhida”. Sighi a ligi ‘Sardigna e crisi económica: sa disfida citia citia tra industria pesanti e ambienti’

Apretu traballu: cras manifestada de Cgil, Cisl e Uil. Giunta asuta de acusa

cgil cisl uil(IlMinuto) – Casteddu, 19 de su mes’e arbili – “Fintzas a immoi is atzionis de sa Giunta regionali po afrontai a s’apretu ocupatzioni e po afrontai a sa crisi industriali funt stetias scassas meda e su Guvernu natzionali est intervenniu scéti po ndi liai risorsas a sa Sardigna, abarrendi senz’e fai nedda a fac’e de sa crisi económica e sociali de s’Ísula”. Est cantu denunciant Cgil, Cisl e Uil in su bolantinu chi at essi donau cras in sa manifestada chi s’at a tenni in Casteddu. Sighi a ligi ‘Apretu traballu: cras manifestada de Cgil, Cisl e Uil. Giunta asuta de acusa’

Presonis. 29 diris po tenni s’arrespusta asuba de s’estraditzioni. Sa lota contr’a sa burocratzia de unu presoneri rumenu

carcere Sdr(IlMinuto) – Casteddu, 19 de su mes’e arbili – Sa burocratzia est una de is primus càusas de su “subracàrrigu de is presonis italianas e de s’auséntzia de arrespetu de is diritus de is presoneris”. Est cantu narat cun d-una nota Maria Grazia Caligaris, presidenti de s’assótziu Socialismo Diritti e Riforma, denunciendi a s’acuntéssia de A. A. D.  presoneri rumenu in Igrèsias, in abetu de duus annus de s’estraditzioni. Estraditzioni aprovada in su mes’e ledàminis de is autoridadis rumenas e agoa, in su mes’e gennàrgiu de su 2011, passada a s’esàminu de sa Camera de consillu de sa Corti de Apellu de Roma.
Mancai is líteras po si movi debressi A. A. D. sighit a essi presoneri in Sardigna. Sighi a ligi ‘Presonis. 29 diris po tenni s’arrespusta asuba de s’estraditzioni. Sa lota contr’a sa burocratzia de unu presoneri rumenu’

Cumitau Master and Back: “Camminus de torrada 2010 in su mes’e làmpadas o in atóngiu? Sceberu burdu. Istitutzionis pagu trasparentis”

(IlMinuto) – Casteddu, 19 de su mes’e arbili – Su diretori de s’Agentzia regionali po su Traballu, Stefano Tunis, no at mantenniu su fueddu. Si in sa cuferéntzia de imprenta de su 23 de su mes’e fiàrgiu su númeru unu de bia Is Mirrionis iat promítiu sa pubblicatzioni de su bandu “Camminus de torrada 2010″ intru is primus tres mesis de su 2011, immoi a s’Urp de s’Agentzia de su Traballu si benit a sciri invecis ca su bandu at essi pubblicau “in su mes”e làmpadas o ancora prus a tradu, in atóngiu, impari cun cussu de su 2011″. Est cantu acrarat cun d-una nota su Cumitau Master and Back, denunciendi a unu “sceberu burdu e de pagu arrespetu in is cunfrontus de is milla e prus de milla professioneris sardus chi abetant custu bandu de un’annu e prus”. Sighi a ligi ‘Cumitau Master and Back: “Camminus de torrada 2010 in su mes’e làmpadas o in atóngiu? Sceberu burdu. Istitutzionis pagu trasparentis”’

“Cun nos in Tramatza po cambiai a su territóriu” in sa bidda in provìntzia de Aristanis s’apuntamentu cun s’innovatzioni de “Sardegna 2.0″

(IlMinuto) – Casteddu, 19 de su mes’e arbili -  At a cumentzai de Tramatza e at a circai de trisinai a is professionalidadis prus bellas de su territóriu po torrai a promovi sa Sardigna. Est custu su progetu de “Sardegna 2.0″, chi at aprontau s’eventu “Con noi a Tramatza per cambiare il territorio”. Una bidea chi nascit de sa retza gràtzias a unu grupu professionali creau in Linkedin chi immoi s’oberrit a totus cussus chi nd’ant a bolli fai parti. Un’apuntamentu fundau in su mundu de s’innovatzioni, aundi professoneris chi benint de diversus campus s’ant a atobiai po donai vida a un’apuntamentu informali, nàsciu de terra e líberu, chi tenit comenti iscopu cussu de torrai a fai nasci a su territóriu. Sighi a ligi ‘“Cun nos in Tramatza po cambiai a su territóriu” in sa bidda in provìntzia de Aristanis s’apuntamentu cun s’innovatzioni de “Sardegna 2.0″’