> Anfiteatru romanu: dex’annus de ‘linnàrgiu’, annarbamentus e ispetàculus | ilMinuto

Anfiteatru romanu: dex’annus de ‘linnàrgiu’, annarbamentus e ispetàculus

(Chistionis e Opinionis) – Casteddu, 26 de su mes”e arbili - No ddoi funt dúbbius. Su ‘linnàrgiu’ at causau su destrossu de s’Anfiteatru romanu de Casteddu. Sa crobetàntzia de linna chi de dex’annus revestit a s’istrutura at fattu nàsci mufas chi ant disastrau is tribunas scavadas casi duumilla annus fait in sa roca. Ddu cunfirmat su relatu de is espertus de s’Istitutu superiori po sa cunservatzioni e su restoramentu, chi ant fattu una bisita in s’arburada Fra Nàtziu su 10 de su mes’e martzu passau. Relatu chi, perou, no praxit a Mauru Pili. Po su parlamentari de su Pdl “Is tribunas in linna funt postas in modu de no s’acabiddai a s’Anfiteatru. Ammantant scéti su stampu lassau de sa strossa de is séculus passaus”. Fanny Cao, de Itàlia Nostra Sardigna, esaminat scéti sa nàscida de is dannus fattus in is úrtimus dex’annus. “Est beni a ammentai – precisat Cao – ca is imbastimentus chi oi coberrint is gradinus mannus furiant stetius autoritzaus dex’annus fait de su subrintendenti a is Benis Archeológicus de insaras, Vissente Santoni, scéti temporaneamenti, e depiant essi scordonaus puntualmenti in su 2005. Po agiudai is dimandhas de is operadoris de s’ispetàculu sa scadéntzia no furiat stetia arrespetada e furiant stetias donadas diversas pròrogas”. S’acórdiu tra Comunu e Subrintendétzia a is Benis archeológicus po smuntai is tribunas e torrai a donai su monumentu a sa citadi parrit no essi atesu meda. Est de is diris passadas s’atóbiu, a su chi parrit determinanti, tra su síndhigu Emili Floris e su Subrintendenti Marcu Minoja. Asuba de sa chistioni “linnàrgiu” de pagu est stetiu obertu unu spricullitu. “Fiamenti – s’alligrat su ‘Gruppo di intervento giuridico’ – sa Procura de sa Reprúbbica de Casteddu at obertu unu spricullitu po su ‘linnàrgiu’, abbusivu e senz’e permissu asuba de su pranu de su paisaggiu, chi de annus meda oprimit a s’Anfiteatru romanu”. No est acabbada innoi. Asuba de s’acuntéssia – ammetat su Gig – “ddoi est un’àtera procedura penali po s’intregu de s’Anfiteatru po is ispetàculus chi tenit comenti iscopu su guadàngiu e chi est stetiu donau senz’e ni conca ni peis, est a nai senz’e nisciunu sceberu de parti de chini donàt intregau”. Po annus meda in s’Anfiteatru de Casteddu funt andaus in iscena ispetàculus chi ant portau dinai meda.

E bosàterus ita ndi pensais?

Scàrriga custa nova

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda

RAS

© RIPRODUZIONE RISERVATA

3 Arrespustas a “Anfiteatru romanu: dex’annus de ‘linnàrgiu’, annarbamentus e ispetàculus”


  • sa narba caba de su cieu “puru”puetta est ipaiada cun is scie chimiche, sa narba de is mattas de oi est diversa meda de su “muschio” chi fadiat asuba de is mattas in su 1980…

  • prus aprestus, medas cagadas architettonicas no si depiant fai… e medas architettus obiant cundannaus a marrai sa terra…

  • tenis arrexoni Craudiu medas architettus no funt bonus a nudda e fainti su bellu tempus po mori de is politicantis esti po crupa de cussustus ca eusu perdiu s’anfiteatru…de is sciasa chimicasa at tocai a fueddai de prus…lasseusu perdi ingunisi funti totu cosasa militaris

Is cummentus funt serraus.