> Ammaletzus fascistas a su Minatore Rosso. Sa solidariedadi de Sns, Cgil, Sc e Osservatóriu « ilMinuto – notizie Mediterranee – edizione Sardegna

Ammaletzus fascistas a su Minatore Rosso. Sa solidariedadi de Sns, Cgil, Sc e Osservatóriu

Antonello Tiddia Minatore Rosso(IlMinuto) – Casteddu, 28 de su mes’e arbili – Su Minatore Rosso no est a solu. A 24 oras de sa bessida in is pàginis de s’Unione Sarda de su Surcis de un’artículu chi denunciat ammaletzus fascistas grais a Antonello Tiddia cun d-una lítera anònima mandada a sa redatzioni de Crabònia de primu cotidianu sardu, funt medas is proas de solidariedadi – puru in Facebook – in faori de su protagonista de sa mobilitada contr’a su fàbbricu de su Radar in Capo Sperone: s’úrtima de medas batallas in annus e annus de atividadi política e sindacali. “Su Minatore Rosso – scririt Anghelu Marras de su Sindacadu de Sa Natzione sarda – no est a solu, cun issu ddoi est sa partis mellus de su pópulu sardu. Is sórigas chi, dógnia tanti bessint de is bassas insoru, po spaniai sa pesta, scipiant chi cun is ammaletzus e is intimoriggiamentus, no ant a firmai sa boluntadi nostra de cambiai su tempus benidori de sa Sardigna e de fai cuntentu e diciosu su Pópulu nostru”. A su costau de Tiddia, delegau sindacali Rsu Carbosulcis, ddoi est puru sa Cgil. “Est – precisat su segretàriu generali de sa Fltem Cgil de su Surcis Igresienti Francesco Carta – unu fatu grai meda e foras de tempus e de su mundu, unu modu afastiadori po fai citiri una boxi de scuncórdiu democràticu asuba de un’argumentu chi tenit in su coru suu sa saludi e sa seguresa de is citadinus”. Acanta a su Minatore Rosso puru Sinistra Critica. Donendi sa solidariedadi de Sc a Tiddia – militanti de custa organizatzioni anticapitalista – Gianluigi Deiana precisat “sa capacidadi de Tiddia de mandai ainnantis senz’e spíritu setàriu sa lota comunista a su costau de is contrariedadis prus fàcili de ferri, e tra custas prusatotu de is contrariedadis indipendentistas e anarchicas”. S’Osservatóriu po is libertadis e contr’a is scontrórius ammentat difatis s’impignu de su Minatore Rosso “po sa libertadi de Bruno Bellomonte”, dirigenti de aMpI. “Nos pensaus cun Amtonello – precisat s’Osservatóriu – chi Bruno siat innocenti e naraus ca est bregúngia maba chi una personi depat abarrai in presoni po duus annus in abetu chi finat su primu gradu de unu processu sez’e ni conca e ni peis”.

© RIPRODUZIONE RISERVATA

0 Arrespustas a “Ammaletzus fascistas a su Minatore Rosso. Sa solidariedadi de Sns, Cgil, Sc e Osservatóriu”


Is cummentus funt serraus.