> Sa Die de sa Sardigna: istória e apuntamentus a 217 annus de sa bogada de is piemontesus | ilMinuto

Sa Die de sa Sardigna: istória e apuntamentus a 217 annus de sa bogada de is piemontesus

Festa della Sardegna(Chistionis e Opinionis) – Casteddu, 28 de su mes”e arbili - Su 28 de su mes’e arbili de su 1794 un’avolotu populari iat custrintu is piemontesus e su vicerei Balbiano a si fuiri de Casteddu. In su mes’e cabudanni de su 1993 su Consillu regionali de sa Sardigna fait diventai custa data “sa diri de su pópulu sardu: Sa Die de sa Sardigna. Sa Festa est stetia celebrada po sa primu borta in su 1994, a duus séculus giustus giustus de is “Vésperus sardus”. Cun s’istitutzioni de custa festa sa Regioni Sardigna torrat agoa de 200 annus po “ammanniai sa connoscéntzia de s’istória e de is valoris de s’autonomia, po su prus tra is levas noas”, comenti narat sa lei regionali 44 de su 1993. Sa lei intregat a s’assessori regionali de sa Púbblica istrutzioni su cómpitu de scriri unu programma de manifestadas e propostas culturalis po sa “Diri de su pópulu sardu”. Ocannu su calendàriu de is eventus andant de mércuris 27 fintzas a sàbudu 30 de su mes’e arbili. Su coru de sa Festa est cun craresa sa diri de su 28 de su mes’e arbili. Duus is apuntamentus previdius in Casteddu: sa Tzerimònia de ammentu chi s’at a tenni in sa Bibblioteca regionali de s’arburada Trieste in Casteddu – cun sa participatzioni de su presidenti de sa Giunta regionali e de s’assessori de sa Púbblica istrutzioni – e sa Festa populari cun sa rassegna de grupus musicalis in pratza Palatzu fintzas a mesunoti. Apuntamentus importantis puru in Tàtari, Aristanis e Nùgoro. De signalai, po su 29 de su mes’e arbili s’eventu aprontau de s’ISRE in Nùgoro – in s’auditorium de bia Mereu – una diri dedicada a sa língua sarda. Su mangianu est difatis dedicau a sa mostra de pubblicatzionis, locandinas, calendàrius e proietzionis de pelliculas de s’ISRE in sardu. In su merì, a is 17.00, est previdia sa presentada de su “Vocabolàriu sardu in lìnia” de Pedru Casu. Comenti giai nau, sa lei chi reconoscit Sa Die de sa Sardigna bolit promovi is “valoris de s’autonomia” tra is giòvanus. Ma ddoi est una parti de su pópulu sardu chi cunsiderat custa data in modu diversu. Ndi funt un’esémpiu is duas diris, su 27 e su 28 de su mes’e arbili, aprontadas de aMpI in Tièsi, “Sa die de Sa Patria sarda”, chi bolint essi una frimmada de importu mannu po s’istória de s’indipendentismu sardu, cun is rapresentantis de Irs, Sni, Paris, Progres, Indipendentzia, Indipendentistas e de aMpI etotu, ingíriu a sa mantessi mesa a fueddai impari de sa “Carta de is diritus de sa natzioni sarda”.

E bosàterus ita ndi pensais?

Scàrriga custa nova

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda

RAS

© RIPRODUZIONE RISERVATA

4 Arrespustas a “Sa Die de sa Sardigna: istória e apuntamentus a 217 annus de sa bogada de is piemontesus”


  • Augurius a totus is sardus liberus, oi est sa nostra diri spereusu de arribbai in su berusu a sa libertadi, indipendentzia!

  • Su coro si frimada solu a ti pensare Sardigna patria amada

  • A tie Sardigna:
    in conca mia restadu non b’ hada ne latina ne itala poesia, si in cussas limbas l’haere impastada mi dian haer nadu chi no est mia: Coment’isco faeddho, eccola nada, però est cosa mia et non furada. Ja semus arrividos a bellu puntu, posca ‘e 200 annos, ‘alu isciaos in terra nostra. (Padre L.Cubeddu)

  • In su 2012 seriat una cosa interessante faghere una festa manna manna in “Sa die de sa Sardinnya” cun sa segunda Marcia pro s’Indipendentzia ki, preparendela dae como, poderiat essere meda galana. Pro custu kerzo narrere a totus sos movimentos indipendentistas de provare a l’ organizare e, totus impare, a organizare una tres dies de festa, no solu de dibatitos ma de musica, de manigu, de teatru e de ateras medas cosas. Inue ? In Aristanis, pro ki totus bi potana accudire.

Is cummentus funt serraus.