> Stochigiada manna po su turismu e po is disterraus. Sa Sardigna s’arrebbellat a sa carestia de is traghetus | ilMinuto

Stochigiada manna po su turismu e po is disterraus. Sa Sardigna s’arrebbellat a sa carestia de is traghetus

(Chistionis e Opinionis) – Casteddu, 7 de su mes”e arbili - De su 5 a su 13 de su mes”e austu una família de cuartru personis cun sa màchina no at a spendi prus pagu de 838 eurus po unu viàgiu in traghetu andada e torrada Genova-Terranòa. Ddu fait sciri un’inchiesta noa de su periodicu Altroconsumo. In s’istadi chi benit arribbai in nai in Sardigna at essi prus pagu cumbenienti, cun tarifas crescias de su 66% e pagu prus e incarimentus chi superant puru su 100%. Is cusseguéntzias funt craras: is dannus po sa stagioni turistica ant essi mannus meda e po is citadinus sardus disterraus at essi meda prus caru arribbai in Sardigna. “Is tres principalis compagnias – denunciat Enzu Cugusi, rapresentanti de Disterraus sardus Torinu – ant fattu aumetai is tarifas talmenti meda chi po unu númeru mannu de famílias, at essi impossíbbili cabai in Sardigna assumancu una borta a s’annu”. Is assótzius principalis de is consumadoris acusant a is compagnias Moby lines e Sardinia Ferries de s’essi cuncertadas asuba de is prétzius po su stadiabi a is dannus de is utentis. Sa Tirrenia Spa at fintzas a immoi carmierau is prétzius – denunciant in d-un’interrogatzioni is consilleris regionalis de su grupu Mistu Angiulu Cuccureddu e Massimu Mulas – ma immoi no acetat is prenotatzionis po su stadiabi po mori de sa situatzioni finatziaria pagu segura e po mori de sa gara po sa béndhida de totus is azionis. Su Casper – cumitau de is principalis assótzius de is consumadoris – at presentau recursu a s’Antitrust. Sa protesta est lompia fintzas in Facebook. In su social network funt casi 3milla is viagiadoris toscanus a si lamentai de sa “malacrimentzia po chini amat fai turismu in Sardigna”. Cida passada, puru sa Giunta regionali at nau sa sua asuba de sa chistioni. “In is diris chi benint – at assegurau su presidenti de sa Regioni Sardigna Ugu Cappellacci – eus a chistionai cun s’Antitrast po contrastai a is aumentus chi no funt cumpatìbilis cun is necessidadis de is sardus, de is bisitadoris e cun su sistema económicu de s’Ísula nostra”.

E bosàterus ita ndi pensais?

Scàrriga custa nova

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda

RAS

© RIPRODUZIONE RISERVATA

2 Arrespustas a “Stochigiada manna po su turismu e po is disterraus. Sa Sardigna s’arrebbellat a sa carestia de is traghetus”


  • e s’assessori Crisponi at tentu sa faci de nai chi is foressius tunisinus chi seus arricendi in Sardìnnia ant a essi unu perìgulu po sa stasoni turìstica de Casteddu. Arratza de genti chi si gubernat.

  • bravu Lisandru arratza de genti… Funti maccusu e tocada a segai is cadenasa

Is cummentus funt serraus.