> Traballu: de sa Provìntzia de Casteddu risossas po permiti de pigai a 50 traballadoris e po fai impresa | ilMinuto

Traballu: de sa Provìntzia de Casteddu risossas po permiti de pigai a 50 traballadoris e po fai impresa

(IlMinuto) – Casteddu, 14 de su mes’e làmpadas – Sa Provìntzia de Casteddu permitit de pigai traballadoris chi arricint ammortitzadoris socialis o “disvatagiaus”. Su progetu – lamau “Azione di sistema welfare to work” – est fattu de duus bandus chi scadint su 7 de su mes’e argiolas de su 2011: su primu bolit pròmovi su traballu a tempus indeterminau de 50 traballadoris, su segundhu agiudat a fai nàsci 10 impresas noas. “Su progetu – acrarat s’assessori provintziali de su Traballu Lorena Cordeddu – tenit s’iscopu de trisinai is meris. Po donniunu de is postus de traballu a tempus indeterminau donaus a traballadoris chi pigant is ammortitzadoris socialis, o po cussus ‘disvantagiaus’, funt previdius bonus de 15milla eurus e una risossa po afortiai is cumpeténtzias de is traballadoris de 2milla eurus”. “Su progetu – acrarat Cordeddu – est indiritzau puru a cussus sugetus chi bolint ativai impresas noas, custas podint essi in forma privada e in forma societaria, e ant a pigai unu bonus de 15milla eurus”. Su bandu precisat chini funt is sugetus “divantagiaus” interessaus a tot’e is duus bandus: senz’e impreu/disimperaus de assumancu ses mesis; senz’e impreu/disimperaus cun prus de 50 annus; senz’e impreu/disimperaus chi no tenit diploma de iscola superiori o professionali.

© RIPRODUZIONE RISERVATA

0 Arrespustas a “Traballu: de sa Provìntzia de Casteddu risossas po permiti de pigai a 50 traballadoris e po fai impresa”


Is cummentus funt serraus.