> “Eus a chistionai de sa lei Messarítzia”. Promissa agoa de sa mobilitada Mps. Tres ferius intre is manifastantis | ilMinuto

“Eus a chistionai de sa lei Messarítzia”. Promissa agoa de sa mobilitada Mps. Tres ferius intre is manifastantis

(IlMinuto) – Casteddu, 27 de su mesi de argiolas – Sa promissa de torrai a biri sa lei regionali 15 asuba de sa Messarítzia. Antzis, s’impignu a discútiri de custa lei in sa Commissioni regionali Messarítzia cun s’assessori regionali Mariano Contu e cun su Movimentu Pastoris Sardus. Est custu s’arrisurtau chi Mps portat a domu a sa fini de s’atopu de ariseru a merì cun su Presidenti de su Consillu regionali, Claudia Lombardo. A s’atóbiu ant participau puru is rapresentantis de su Movimentu Artesanus e Butegaju líberus. Furiat stetiu própriu s’arrefudu de is primus mamentus de parti de Lombardo de arriciri puru una delegatzioni de su movimentu contra a Equitalia a allui sa passéntzia de is manifestantis.
Pagu prus de 3milla manifestantis lompius ariseru a mangianu in Casteddu de totu sa Sardìnnia po pigai parti a unu corteu paxiosu – tucau a is 11.00 de sa pratza a faci de sa Fiera – e aghillius in bia Roma de un’iaxi de politziotus e carabineris ingíriu de su Palatzu. A faci de is 13.20 de ariseru funt cumentzadas in càrrigas – cropus cun tuturus e lagrimogenus – de is politziotus bistius de gherra. Segundu cantu narant diversas boxis is cropus – donaus a chini circàt de s’acostai a s’intrada de su Consillu regionali o simplementi a chini s’acostàt a is politziotus – ant fatu assumancu tres ferius tra is manifestantis: duus pastoris e un’artesanu.
“Sa Regioni – commentat cun d-una nota a Manca pro s’Indipendentzia – arrespundit a is dimandas de is pastoris cun s’única arma chi ddi exit: sa violéntzia de is promissas fatas a s’ària, sa violéntzia de s’arrefudu e de su cunfrontu e, ariseru in Casteddu, sa violéntzia de is tuturus”

© RIPRODUZIONE RISERVATA

0 Arrespustas a ““Eus a chistionai de sa lei Messarítzia”. Promissa agoa de sa mobilitada Mps. Tres ferius intre is manifastantis”


Is cummentus funt serraus.