> “Gettiamo le basi”: assumancu 232 mortus po mori de is belenus de gherra e de is polgonus. Cras in Casteddu sit in cun is familiaris de is militaris bocius | ilMinuto

“Gettiamo le basi”: assumancu 232 mortus po mori de is belenus de gherra e de is polgonus. Cras in Casteddu sit in cun is familiaris de is militaris bocius

(IlMinuto) – Casteddu, 14 de su mes’e argiolas – Pediri beridadi e giustítzia po is “mortus po mori de is belenus de gherra e de is poligonus militaris”. Acabai sa strossa liendi debressi is fainas militaris de Chirra, Teulada e Capo Frasca. Cun custus obietivus is famílias de is militaris bocius de is tumoris de gherra e su cumitau “Gettiamo le Basi” ant aprontau unu sit in in Casteddu. S’apuntamentu est po cras a mangianu a is 10.00 in sa pratza de su Cramu. “Su Ministeru de sa Difesa e su Guvernu, agiudaus de sa majoria de is políticus – si ligit in d-una nota – sighint chentz’e cuscéntzia a no bolli biri su númeru mannus de is mortus”. “Gettiamo le basi” e is familiaris de is militaris bocius faint unu bilànciu provisóriu de sa strossa, arribendi a contai assumancu 232 mortus. “In su Pisq – si ligit in d-una nota de imprenta – scideus de 28 militaris chi si funt pigaus sa ‘sindrome di Quirra’, sa Procura de Lanusè spricullitat asuba de sa morti de pagu prus de 150 civilis. In Capo Frasca contaus ses militaris malàdius, in Teulada noi militaris e 39 cuvilis. Is númerus funt asuta meda de su númeru beru […] custus funt scéti cussus chi connosceus”.

© RIPRODUZIONE RISERVATA

0 Arrespustas a ““Gettiamo le basi”: assumancu 232 mortus po mori de is belenus de gherra e de is polgonus. Cras in Casteddu sit in cun is familiaris de is militaris bocius”


Is cummentus funt serraus.